Má ætla að flensan nái hámarki á næstunni
"Þetta er heldur minna en í fyrra en það er greinileg inflúensa í gangi," segir hann. Aukið álag sé á starfsfólk heilsugæslustöðva og tíðari fjarvistir í skólum og víðar vegna flensunnar. Um þrjár vikur séu liðnar frá því að álag á Læknavaktinni fór að aukast vegna flensunnar. "Við höfum þurft að kalla inn aukafólk, miðað við það sem við erum með venjulega," segir Þórður. Hann segir að ætla megi að inflúensan fari að ná hámarki á næstunni. Þeir sem veikist af henni fái oft háan hita í nokkra daga en flestir nái sér þokkalega á um vikutíma. Þó geti fylgikvillar gert vart við sig og nefnir Þórður lungnabólgu, lungnakvef, ennis- og kinnholubólgur, eyrnabólgur, og ýmsar bakteríusýkingar. Því þurfi fólk að fara sér hægt meðan það er að ná sér af flensunni.
Atli Árnason, yfirlæknir á Heilsugæslunni í Grafarvogi, tekur í sama streng og Þórður og segir veikindi vegna inflúensu minni í ár en í fyrra.
Mikið um veikindi hjá börnum og unglingum
"En það eru talsverð veikindi, sérstaklega hjá börnum og unglingum," segir Atli. Margir hafi leitað læknis vegna inflúensu í síðustu viku og um helgina. Þá virðist flensan fara í meltingarfærin hjá sumum sem veikjast af henni og fylgi því niðurgangur og jafnvel ógleði og uppköst.Pétur Pétursson, yfirlæknir á Heilsugæslunni á Akureyri, segir inflúensuna í ár alls ekki skæða. "Þetta hefur ekki verið mjög áberandi faraldur heldur hafa tilfelli verið að stinga sér niður. Mér vitanlega hefur ekki verið mikið um að hálfu bekkirnir leggist í flensu lengur. Það bar aðeins á því í janúar," segir hann.
Á Ísafirði hefur verið mikið um veikindi vegna inflúensu undanfarið. Í gær höfðu foreldrar barna í Grunnskólanum á Ísafirði tilkynnt alls um 60 fjarvistir barna og var í flestum tilfellum um veikindi að ræða, að því er fram kom á fréttavef Bæjarins besta í gær. Þar var haft eftir Magnúsi Jónssyni, skólastjóra, að mikil veikindi hefðu verið frá því í síðustu viku. Kennararnir hefðu þó alveg sloppið hingað til.
