Einar K. Guðfinnsson, sjávarútvegsráðherra, sagði að stefnt væri að því að hefja á ný hvalveiðar í atvinnuskyni hér við land. Ákvörðun um það hefði ekki verið tekin en Íslendingar hefðu heitið því, þegar gengið var í Alþjóðahvalveiðiráðið að nýju, að ekki yrðu hafnar atvinnuveiðar hér fyrr en í fyrsta lagi sumarið 2006. Málið væri því nú í höndum Íslendinga.

Einar var að svara fyrirspurn frá Magnúsi Þór Hafsteinssyni, þingmanni Frjálslynda flokksins, um hvað væri að frétta af hrefnurannsóknum sem farið hafa fram undanfarin sumur. Sagði Magnús, m.a. að Íslendingar hefðu verið svo víðáttuvitlausir, að samþykkja hvalveiðibann Alþjóðahvalveiðiráðsins á sínum tíma, og með því brotið eina af grundvallarreglunum í auðlindanýtingu, þá að nýta alla hlekki vistkeðjunnar í hafinu með skynsamlegum hætti en þarna hefði efsti hlekkurinn verið friðaður.

Einar sagði að stefnt væri að því að halda vísindaveiðum á hrefnu áfram í sumar með eðlilegum hætti. Á árunum 2003 til 2005 hefðu verið veiddar 100 hrefnur af 200 sem áformað væri að veiða í vísindaskyni. Einar sagði, að til stæði að kynna stöðu rannsóknanna og frumniðurstöður þeirra á ársfundi Norður-Atlantshafssjávarspendýraráðsins, NAMMCO, sem haldinn verður á Selfossi á þriðjudag.

Þingmenn sem tóku til máls hvöttu til þess að hvalveiðar í atvinnuskyni verði teknar upp að nýju. Magnús Þór sagði að ekki væri eftir neinu að bíða og ekkert væri að óttast í þessum efnum. Vitnaði Magnús til reynslu Norðmanna sem ekki hefðu lent í neinum vandræðum með sínar veiðar og þeir skömmuðust sín heldur ekkert fyrir að veiða hrefnu.

Sjávarútvegsráðherra sagði, að enginn væri hræddur í þessum efnum. Vísindaveiðunum verði haldið áfram á þessu ári, ekki með minni krafti en gert hefði verið hingað til. „Það liggur ekki fyrir hin pólitíska ákvörðun um hvenær (atvinnu)veiðar verða hafnar en ég sagði það áðan, að það væri stefnt að því að hefja veiðar í atvinnuskyni á ný... Það sem skiptir hins vegar máli í þessu sambandi, að við verðum einnig að vinna að því að við höfum markaðsaðgang fyrir okkar afurðir ef við ætlum að hefja þessar veiðar af fullum krafti. Þennan markaðsaðgang verðum við að tryggja okkur erlendis og að því erum við að vinna. Það er hins vegar mjög athyglisvert, að þessum hvalaafurðum hefur verið tekið ákaflega vel hér á landi, gagnstætt því sem að mjög hefur verið haldið fram og var m.a. haldið fram í sölum Alþingis, að sá tími væri liðinn í okkar sögu að menn borðuðu hvalkjöt. Það er vaxandi neysla á þessu kjöti og með góðri markaðssetningu á síðasta ári tókst ákaflega vel til í þeim efnum," sagði Einar K. Guðfinnsson.