Úrskurðarnefnd fjarskipta- og póstmála hefur fellt úr gildi úrskurð Póst- og fjarskiptastofnunar um álagningu rekstrargjalds á Símann hf. fyrir árið 2004 og leggja gjaldið á að nýju. Síminn segir ljóst, að Póst- og fjarskiptastofnun hafi oftekið rekstrargjald af fyrirtækinu, sem gæti numið tugum milljóna króna. Síminn muni krefjast endurgreiðslu hinna ofteknu gjalda.

Fjarskiptafyrirtæki skulu árlega greiða Póst- og fjarskiptastofnun rekstrargjald sem nemur 0,20% af bókfærðri veltu af fjarskiptastarfsemi. Ágreiningurinn á milli Símans og Póst- og fjarskiptastofnunar stóð aðallega um hvort telja skuli svokallaða innri veltu sem hluta af bókfærðri veltu félagsins. Póst- og fjarskiptastofnun taldi innri veltu með í rekstrargjaldsstofni og hækkaði þar með stofninn sem því nemur. Innri velta er reiknuð velta af viðskiptum milli deilda félagsins sem Síminn hf. færir í bókhaldi til þess að aðskilja bókhald einstakra starfssviða félagsins.

Í tilkynningu frá Símanum segir, að staðið hafi verið að álagningu rekstrargjalds með mismunandi hætti gagnvart Símanum og gagnvart keppinautum félagsins, svo sem Dagsbrún. Slíkt samræmist ekki jafnræðisreglu stjórnarskrárinnar og stjórnsýslulaga auk þess að fara gegn lögum um Póst- og fjarskiptastofnun. Úrskurðarnefndin taldi stofnunina jafnframt hafa brotið gegn helstu meginreglum stjórnsýslulaga, þ.e. rannsóknarreglu, leiðbeiningarskyldu og málshraðareglu.