Olíufélagið hefur ákveðið að hækka eldsneyti í dag. Hækkar lítrinn af bensíni um 3,60 krónur og kostar þá 127,90 krónur. Hefur verð á bensíni ekki áður verið hærra í krónum talið. Lítrinn af dísil- og gasolíu hækkar um 2,40 krónur og lítrinn af flotaolíu, flotadísilolíu og svartolíu IFO 30 hækkar um 2 krónur.

Á heimasíðu Olíufélagsins segir, að á síðustu tveimur mánuðum hafi heimsmarkaðsverð á olíu farið stöðugt hækkandi, en mest hafi hækkunin orðið á bensíni eða 18,6% frá 1. febrúar. Staða krónunnar gagnvart erlendum gjaldmiðlum hafi versnað mjög á þessu sama tímabili, en í byrjun febrúar var Bandaríkjadalur skráður á rúmar 62 krónur, en er nú rúmar 74 krónur, sem er 19% hækkun.

Olíufélagið segir, að útsöluverð í sjálfsafgreiðslu á 95 oktana bensíni hafi verið 108,30 krónur um áramót og hafi því hækkað um 14% frá áramótum. Segist Olíufélagið ekki sjá merki um að verð á mörkuðum sé að lækka né heldur, að íslenska krónan sé að styrkjast og því sé útlit fyrir að verð á eldsneyti eigi enn eftir að hækka áður en yfir lýkur.

Eftir breytinguna verður algengasta verð í sjálfsafgreiðslu á stöð með fullri þjónustu á höfuðborgarsvæðinu 122,80 krónur á 95 oktana bensíni og 117,90 krónur á dísilolíu.