Stórefling í alþjóðlegu doktorsnámi og fjölgun brautskráðra doktora, stórauknar vísindarannsóknir í samvinnu við alþjóðlega skóla í fremstu röð, sókn á alþjóðamarkað eftir kennurum og nemendum, bætt starfsaðstaða nemenda og auknar kröfur um námsframvindu eru meðal fjölmargra tölusettra markmiða í stefnuyfirlýsingu Háskólans sem samþykkt var á fundi háskólaráðs í dag.

Skólinn stefnir að skipulagsbreytingum til að einfalda stjórnkerfi og færa rekstrarlega ábyrgð út til deilda. Stefnan felur í sér að heildartekjur Háskólans þurfa að meðaltali að aukast að raungildi um 10% á ári næstu fimm árin.

Kristín Ingólfsdóttir, háskólarektor, kynnti stefnuna í dag og lagði áherslu á að meginmarkmið Háskólans væri að komast í raðir 100 bestu háskóla í heiminum á 10–15 árum.

Í tilkynningu frá HÍ segir, að efling doktorsnámsins við Háskóla Íslands sé lykilþáttur í uppbyggingu hágæðarannsókna á fjölbreyttum sviðum vísinda og fræða, ásamt auknu samstarfi við aðra háskóla, rannsóknastofnanir og fyrirtæki. Gert sé ráð fyrir því að um þriðjungur doktorsnema við skólann árið 2011 verði erlendir og að 10% doktorsnema stundi námið á grundvelli samstarfssamninga við erlenda háskóla um sameiginlegar doktorsgráður.

Fyrirhugað er að miðstöð framhaldsnáms taki til starfa fyrir lok þessa árs og hafi hún m.a. umsjón með gæðum doktorsnámsins.

Í aðgerðunum er mikil áhersla lögð á að bæta aðstöðu fyrir stúdenta og kennara við kennslu og rannsóknir. Greindar verða húsnæðisþarfir einstakra deilda í ljósi fjölgunar stúdenta og starfsfólks og gerðar áætlanir um fjármögnun og framkvæmdir þeim tengdum. Til þess að laða að hæfustu kennarana og stúdentana verður sveigjanleiki aukinn í starfsskyldum og skotið styrkari stoðum undir styrkjakerfi í doktorsnámi. Gerðar verða auknar kröfur um námsframvindu nemenda í grunn- og framhaldsnámi, en að sama skapi aukið við stuðnings- og gæðakerfi kennslu. Nemendum verður gert kleift að skrá sig í hlutanám frá og með haustinu 2007. Nemendum á hvern kennara verður fækkað og þeim verða skipaðir umsjónarmenn úr hópi kennara. 100 fastir kennarar hið minnsta verða ráðnir til skólans á tímabilinu, auk aðstoðarkennara og annars starfsliðs í stoðþjónustu, kennslu og rannsókna.

Til að stefnan gangi eftir þurfa heildartekjur Háskólans að meðaltali að hækka um 10% að raungildi á ári fram til ársins 2011. Sértekjur námu um þriðjungi af heildartekjum síðasta árs, en gert er ráð fyrir að sértekjur aukist um 1,5 milljarða króna á næstu 5 árum. Fjárveitingar ríkisins til skólans þurfa að aukast um 3,4 milljarða króna frá tekjum 2006, að sögn Háskóla Íslands. Þessar hækkanir yrðu í samræmi við niðurstöður í úttekt Ríkisendurskoðunar frá 2004 um hvað Háskólinn þyrfti í viðbótartekjur til að standa jafnfætis skólum, sem hann var borinn saman við í Evrópu. Í úttektinni kom jafnframt fram, að á Norðurlöndum er varið 1,8–1,9% af vergri landsframleiðslu til háskólastigsins, samanborið við 1,1–1,3% á Íslandi.

Háskólinn hefur valið átta háskóla til að miða við árangur af starfi sínu. Annars vegar eru valdir nokkrir háskólar sem Háskóli Íslands var borinn saman við í úttekt Ríkisendurskoðunar 2004 og eru sambærilegir að rekstrarformi, stærð eða námsframboði. Hins vegar eru valdir háskólar á Norðurlöndum og í Bandaríkjunum, sem taldir eru meðal 100 bestu háskóla heims. Skólarnir eru Kaupmannahafnarháskóli, háskólinn í Helsinki, háskólarnir í Lundi og Uppsölum í Svíþjóð, háskólarnir í Björgvin og Tromsö í Noregi, háskólinn í Aberdeen í Skotlandi og Bostonháskóli í Bandaríkjunum.

Nær allir starfsmenn skólans unnu að mótun stefnunnar, ásamt fulltrúum stúdenta og nýdoktora. Haft var samráð við fólk úr stjórnmálum, atvinnulífi og menningarlífi og úr alþjóðlegu háskólasamfélagi. Deildir og einingar leggja nú lokahönd á eigin stefnuskjöl undir leiðarljósi heildarstefnu Háskólans og er áætlað að þau verði tilbúin innan nokkurra vikna.

Heimasíða Háskóla Íslands