Magnús segir mjög fátítt að jarðir í Grímsnesi komi í sölu, svæðið sé eftirsótt og verðið, 235 milljónir, endurspegli gangverð fyrir þetta tiltekna svæði.

"Oft eru einhver frávik frá ásettu verði þegar fjárhæðirnar eru orðnar svona miklar," bendir Magnús á. "En þetta er landmikil jörð, "hrein og tær" þ.e. ekki hefur verið skipulagt neitt á henni, sumarhúsasvæði eða slíkt. Menn sjá ákveðna möguleika ef þeir vilja svo við hafa og það eru nýtingarmöguleikarnir sem ráða verðmynduninni." Magnús segir að jarðaverð hafi hækkað um 100% síðastliðin fimm ár eða svo, þó það sé breytilegt milli svæða og jafnvel innan svæða líka.

"Það hefur orðið meiri leiðrétting á jarðamarkaðnum heldur en íbúðamarkaðnum og það má benda á að þegar fasteignaverð hækkaði síðast, þá hafði jarðaverðið staðið lengi í stað. En jarðaverðið hefur hækkað meira en íbúðaverðið. Ég spái því að jarðaverð eigi alls ekki eftir að lækka á næstunni. Framboðið er heldur minna en eftirspurnin og viðskiptin eru í tiltölulega góðu jafnvægi, þrátt fyrir svolítið pipraða umræðu um að allt sé að verða vitlaust á þessum markaði. Svo er hins vegar ekki, heldur er eftirspurnin aðeins meiri en framboðið."