Norðurál, Hitaveita Suðurnesja og Orkuveita Reykjavíkur skrifuðu í dag undir viljayfirlýsingu um raforkusölu til fyrirhugaðs álvers Norðuráls í Helguvík. Samkvæmt samkomulaginu er fyrsti áfangi álversins allt að 150.000 tonn og mun HS leitast við að sjá um að útvega allt að 150 MW en OR allt að 100 MW. Stefnt er að afhendingu orku fyrir fyrsta áfangann árið 2010.

Í viljayfirlýsingunni er gert ráð fyrir að álverið nái á síðari stigum allt að 250.000 tonna afkastagetu og munu orkuframleiðendurnir reyna að útvega allt að 435 MW þegar fram líða stundir. Samkomulagið er háð tilteknum skilyrðum.

Í sameiginlegri tilkynningu er haft eftir Árna Sigfússyni, bæjarstjóra í Reykjanesbæ, að orkumálin hafi verið stóra spurningamerkið varðandi framgang málsins og stjórnvöld hafi tilgreint orkuöflun sérstaklega sem helsta Þránd í Götu verkefnisins. Nú virðist þeirri hindrun hafa verið rutt úr vegi.

Logan W. Kruger, forstjóra Century Aluminum, móðurfélags Norðuráls, segir í tilkynningunni að samkomulagið sé stórt skref í framgangi áætlana fyrirtækisins varðandi Helguvík. „Við erum sem fyrr afar ánægð með viðskiptaumhverfið á Íslandi og hinn mikla stuðning sem við höfum fengið frá samfélaginu á Suðurnesjum, fulltrúum stjórnvalda og Hitaveitu Suðurnesja hf. og Orkuveitu Reykjavíkur. Við munum vinna áfram í anda þeirrar stefnu að þróa starfsemi okkar í vel skilgreindum áföngum til að tryggja að verkefnið í Helguvík falli sem best að hagsmunum Íslendinga og íslensks hagkerfis.”