Halldór Ásgrímsson, forsætisráðherra og formaður Framsóknarflokksins, hefur rætt þann möguleika við nána samstarfsmenn sína að láta af ráðherraembætti og formennsku í Framsóknarflokknum á næstunni. Gert er ráð fyrir að ákvörðun Halldórs Ásgrímssonar um þetta liggi fyrir næstu daga. Einnig hefur komið til umræðu að Guðni Ágústsson, varaformaður Framsóknarflokksins, láti af því embætti en haldi áfram starfi sínu sem landbúnaðarráðherra.

Innan Framsóknarflokksins eru hugmyndir um að kalla Finn Ingólfsson, fyrrum þingmann og ráðherra, til starfa á ný og að tillaga verði gerð á miðstjórnarfundi framsóknarmanna á föstudag eftir viku um að Finnur verði kjörinn formaður Framsóknarflokksins fram að næsta flokksþingi, sem sennilega verður haldið seint á þessu ári. Verði af þessu mun Finnur væntanlega taka sæti í ríkisstjórn og þá hugsanlega sem fjármálaráðherra. Jafnframt eru uppi hugmyndir um að Siv Friðleifsdóttir heilbrigðisráðherra verði næsti varaformaður Framsóknarflokksins.

Ráðherraembætti skilað til Framsóknar?

Þessar hugmyndir fela í sér umtalsverðar breytingar á skipan ráðherra í ríkisstjórninni. Gert er ráð fyrir að Geir H. Haarde utanríkisráðherra taki við embætti forsætisráðherra, þar sem samningar Sjálfstæðisflokks og Framsóknarflokks um forsætisráðuneytið í upphafi þessa kjörtímabils voru bundnir við Halldór Ásgrímsson persónulega. Þá er hugsanlegt að Framsóknarflokkurinn geri kröfu til þess að fá á ný það ráðherraembætti, sem flokkurinn lét af hendi þegar Halldór Ásgrímsson tók við embætti forsætisráðherra. Frekari breytingar yrðu hugsanlega á ráðherraskipan Sjálfstæðisflokksins en umræður um þær eru tæpast hafnar í Sjálfstæðisflokknum.

Þessar hugmyndir, sem nú eru til umræðu innan Framsóknarflokksins, tengjast úrslitum sveitarstjórnarkosninganna fyrir viku. Forsætisráðherra sagði í sjónvarpsumræðum þegar kjörfundi var lokið að hann hlyti að taka á sig ábyrgð á úrslitum kosninganna að því er Framsóknarflokkinn varðaði, án þess að skýra nánar hvað í þeim orðum fælist.