Hún segir að fundurinn sem slíkur ákveði hvort hann verði opinn utanaðkomandi. „Oftast hefur það verið þannig að ræða formanns er opin fjölmiðlum og fundurinn þar á eftir lokaður. Almennar umræður hafa alltaf verið lokaðar síðustu ár."

Ragna segir enn ekki liggja fyrir hvað gerist á fundinum. „Fundurinn er fyrst og fremst boðaður til að koma saman og skoða stöðuna. Það verður spennandi en eins og stendur virðast fjölmiðlar stjórna þróun flokksins og vita meira en við."

Í miðstjórn Framsóknarflokksins eiga sæti um 150 fulltrúar; bæði almennir flokksmenn, alþingismenn og ráðherrar, landsstjórnarfulltrúar og framkvæmdastjóri flokksins, formenn launþegaráða, fyrrverandi þingmenn, sveitarstjórnarráð og sjö fulltrúar kosnir af landsstjórn. Miðstjórnin fundar tvisvar á ári en aðrir fundir skulu haldnir þegar landsstjórn flokksins ákveður.

Í lögum Framsóknarflokksins segir: „Ef formaður flokksins hverfur úr embætti tekur varaformaður við störfum hans. Miðstjórn skal þá kjósa nýjan varaformann á næsta fundi sínum og gildir kjör hans til næsta flokksþings þar á eftir." Þetta þarf þó ekki endilega að þýða að Guðni Ágústsson, nú varaformaður, verði formaður því einnig kemur fram að ef ritari eða varaformaður hverfi úr embætti kjósi miðstjórnin nýjan fram að næsta flokksþingi.