Herdís Á. Sæmundardóttir, stjórnarformaður Byggðastofnunar, segir í ársskýrslunni, að ekki sé vitað með nákvæmum hætti hvernig þeirri starfsemi, sem Byggðastofnun hafi haft með höndum, verði fyrir komið í væntanlegri nýrri stofnun, Það sé þó ljóst að markmið þeirrar vinnu sé að styrkja og efla þann stuðning við atvinnulífið sem iðnaðar- og viðskiptaráðuneytið hafi á sínum höndum.

„Það er mín skoðun að sú svæðisbundna hugsun sem kemur fram í því, þar sem leitast er við að tengja saman atvinnulíf, mennta- og menningarstofnanir og aðra staðbundna starfsemi feli í sér mörg tækifæri til að efla og styrkja einstök svæði. Með því eru líka gerðar meiri kröfur til heimamanna á einstökum svæðum að bindast samtakamætti og samvinnu í þágu framfara á sínu svæði. Það er þó ljóst að mikið starf er óunnið í mótun þessarar nýju stofnunar. Í þeirri vinnu er mikilvægt að sú þekking og yfirsýn sem fyrir er í kerfinu fari ekki forgörðum og þeir hafðir með í ráðum sem gerst þekkja til atvinnu- og byggðaþróunar á landsbyggðinni," segir Herdís.

Aðalsteinn Þorsteinsson, forstjóri Byggðastofnunarinnar, segir í ársskýrslunni, að veruleg skörun sé í starfsemi Byggðastofnunar og ýmissa opinberra sjóða og stofnana sem starfa að atvinnuþróun. Það sé álit Byggðastofnunar að meginhugmynd frumvarpsins hvað þetta varðar horfi til framfara.