brjann@mbl.is

EKKERT kríuvarp er nú við Reykjavíkurtjörn, en í stóra hólmanum á tjörninni hafa kríur verpt áratugum saman, frá því hólmarnir voru gerðir upp. Endurspeglar þetta ástandið hjá kríum í nágrenni höfuðborgarinnar ágætlega, en varp var t.d. vart komið af stað á Seltjarnarnesinu þegar sérfræðingar áttu leið þar um fyrir skömmu.

Kristinn Haukur Skarphéðinsson, fuglafræðingur hjá Náttúrufræðistofnun, segir að kríustofninn hafi átt erfitt uppdráttar í fyrra vegna skorts á sandsílum, og flest bendi til þess að það sama sé upp á teningnum í ár. Þá hafi fuglinn orpið en ungarnir drepist þegar þeir voru orðnir hálfstálpaðir.

"Nú eru þær ekki einu sinni farnar að verpa, þótt það sé kominn 17. júní. Ég er búinn að fylgjast með fuglum í 30 ár og ég man ekki eftir því að þetta hafi nokkurn tíma gerst," segir Kristinn.

"Því lengra sem líður á sumarið því minni líkur eru á að þetta muni ganga," segir Kristinn. Hann segir þó ekki enn útséð með kríuvarpið, ef það fari í gang fljótlega geti ungarnir verið orðnir fleygir um miðjan ágúst, og þekkt sé að þeir verði fleygir enn seinna. Ljóst sé þó að ástandið er slæmt á Suð-vestur- og Vesturlandi, en það virðist betra annars staðar á landinu.

Skortur á sandsíli hefur einnig áhrif á aðra sjófugla sem lifa á því að jafnaði, þar á meðal rytu og sílamáv. Þessi fæðuskortur rekur svo mávana í auknum mæli frá varpstöðvum inn á höfuðborgarsvæðið, t.d. á Reykjavíkurtjörn, þar sem þeir virðast hafa tekið öll völd. Ekki hefur orðið mikið vart við andarunga á tjörninni.