Starfsmenn Vegagerðarinnar á Ísafirði mótmæltu í dag aðgerðum ríkistjórnarinnar en ríkistjórnin hefur frestað öllum nýframkvæmdum í vegagerð sem ekki eru kominn í útboð fram til 2008. Þau tvö verk sem átti að bjóða út í haust þ.e.a.s. Arnkötludalurinn og framkvæmdir í Mjóafirði hefur verið frestað um óákveðinn tíma. Þá eru ekki taldar þær framkvæmdir sem eru komnar á samgönguáætlun en bjóða átti út 2007 og 2008, að því er fram kemur á Bæjarins besta.

Jón Rögnvaldsson vegamálastjóri segir í samtali við Bæjarins besta að eins og málin horfi við núna þá hafi ríkistjórnin frestað öllum vegaframkvæmdum á landinu sem ekki eru komin í útboð þangað til annað hafi verið ákveðið. Starfsmenn Vegagerðarinnar á Ísafirði lýsa þessum degi sem sorgardegi og komu saman í morgun og mótmæltu aðgerðum ríkistjórnarinnar í hljóði.

Þeir segja að vegir á Vestfjörðum séu ekki boðlegir og segja að Vestfirðingum sé sýnt virðingarleysi með niðurskurði ríkistjórnarinnar. Þann 24. maí skrifaði Sturla Böðvarsson samgönguráðherra í blaðagrein á bb.is að vega- og brúargerð í Mjóafirði yrði lokið árið 2008 en nú stefnir í að ekki verði hafist handa fyrr en í fyrsta lagi árið 2008.