Ögmundur Jónasson, þingmaður Vinstrihreyfingarinnar-græns framboðs, gagnrýnir Sturlu Böðvarsson samgönguráðherra harðlega í pistli á heimasíðu sinni í dag, vegna ummæla ráðherrans í hádegisfréttum ríkisútvarpsins þess efnis að mótmæli starfsmanna Vegagerðarinnar í vikunni væru óviðeigandi. ,,Stundum eiga ráðherrar að þegja. Það hefði Sturla Böðvarsson, samgönguráðherra betur gert í dag," segir í pistli Ögmunds.

Starfsmenn Vegagerðarinnar á Patreksfirði, Hólmavík og á Ísafirði mótmæltu í vikunni ákvörðun ríkisstjórnarinnar um að fresta vegaframkvæmdum á Vestfjörðum vegna þenslu með því að flagga í hálfa stöng, en ríkistjórnin hefur frestað öllum vegaframkvæmdum sem ekki höfðu verið boðnar út.

Sturla sagðist óánægður með að eigur Vegagerðarinnar væru notaðar með þessum hætti, mótmælendur væru undirmenn vegamálastjóra sem hefði ,,húsbóndavald" yfir þeim. Menn hefðu þó málfrelsi og leyfi til þess að mótmæla aðgerðum stjórnvalda að vild.

Ögmundur gagnrýnir orðaval Sturlu sem sé þó ekki hneykslaður á eigin athæfi. ,,Sturlu Böðvarssyni væri hollt að hugleiða að fólkið er að mótmæla svikum hans og ríkisstjórnarinnar á marggefnum loforðum og heitstrengingum fyrir síðustu alþingiskosningar. Það er ekkert skrítið að fólk mótmæli slíku; það ber vott um að það er ekki dautt úr öllum æðum, enn er sem betur fer lífsmark með þjóðinni. Það finnst ríkisstjórninni greinilega skelfileg tilhugsun og þurfi nú að beita "húsbóndavaldi." Hvers vegna skyldi eiga að skera niður vegaáætlun? Ástæðan liggur í stóriðjustefnu ríkisstjórnarinnar," segir Ögmundur í pistli sínum.

Ögmundur segir að Vestfirðingum og fólki á norðausturhorni landsins sé ætlað að súpa seyðið af þeirri stefnu. ,,Í henni liggur þensluvaldurinn sem ætlunin er að slá á. Í hádegisfréttum RÚV var rifjuð upp aðför umhverfisráðherra á sínum tíma gegn landvörðum sem mótmæltu stórfelldum náttúruspjöllum við Kárahnjúka. Þeir létu stjórnast af tilfinningum og réttlætiskennd. Ég var í hópi þeirra sem tók ofan fyrir þeim og fagnaði framtaki þeirra. Þeim var hins vegar hótað öllu illu af yfirvöldum, sem sýndu smæð sína og virðingarleysi gagnvart skoðunum og tilfinningum annarra," segir Ögmundur.