Árni Þór Sigurðsson, borgarfulltrúi Vinstri-grænna, mun á borgarráðsfundi á morgun leggja fram tillögu frá borgarfulltrúum VG um að þegar verði hafinn undirbúningur að því að Reykjavíkurborg dragi sig út úr byggðasamlaginu Strætó og endurreisi Strætisvagna Reykjavíkur. Jafnframt að gerð verði áætlun um að stórefla almenningssamgöngur í Reykjavík með aukinni ferðatíðni og auknum forgangi strætisvagna í umferðinni.

Í greinargerðinni segir:

„Stjórn Strætó bs. hefur nú þegar ákveðið að skerða verulega þjónustu Strætó. Er vísað til þess að breytingar á leiðakerfinu í mars sl. hafi ekki skilað auknum farþegafjölda og þar með meiri tekjum. Það er í hæsta máta ósvífni af stjórnarformanni Strætó bs. að láta eins og fárra mánaða reynslutími geti verið marktækur í því sambandi.

Ekkert tillit er tekið til þeirrar gengisþróunar sem orðið hefur undanfarna mánuði og stórhækkun eldsneytisverðs sem hefur afar slæm áhrif á rekstrarafkomu Strætó. En það sem varðar þó enn meiru er að ekki er gert ráð fyrir áhrifum kjarasamninga á rekstur fyrirtækisins en rekja má nærri helming rekstrarvandans nú til þess þáttar.

Ljóst er að forsenda þess að unnt sé að auka farþegafjölda og tekjur Strætó er að þjónustan verði stóraukin. Skert þjónusta, eins og nú hefur verið ákveðin, mun enn auka vanda fyrirtækisins en ekki leysa hann. Í málefnaáherslum nýs meirihluta í Reykjavík er talað um að gera tilraun til að efla almenningssamgöngur með ókeypis strætó fyrir tiltekna hópa. Ekki verður séð að nýleg samþykkt stjórnar Strætó um skerta þjónustu samrýmist stefnu meirihlutans í borgarstjórn Reykjavíkur.“