Stjórnsýsluúttekt á Strætó bs. hefst á næstu dögum
Strætó við Hlemm. Þorvaldur Örn Kristmundsson
Á fundi stjórnar Strætó bs. þann 31. mars s.l. var lögð fram greinargerð þar sem fram kom að fjárhagsáætlun fyrirtækisins fyrir árið myndi ekki standast, þar sem fjárvöntun vegna kjarasamnings og aukins aksturs „gæti verið 220 milljónir króna, þar af 140 milljónir vegna launa og óvissu í fargjaldatekjum upp á 55 – 60 milljónir því til viðbótar.” Svo segir í minnisblaði frá Ármanni Kr. Ólafssyni, formanni stjórnar Strætó bs., og Ásgeiri Eiríkssyni, framkvæmdastjóra fyrirtækisins, sem lagt var fram á fundi borgarráðs í dag.
Þar kom fram að Strætó tapaði um einni milljón króna á dag í rekstri fyrirtækisins s.l. vetur og að stjórn Strætó hafi ákveðið að 10 mínútna tíðni vagna yrði felld niður yfir sumarímann frá 1. júni til 20. ágúst. Þá hafi fjárhagsáætlun Strætó fyrir árið 2005 verið afgreidd án þess að gert hefði verið ráð fyrir kostnaðarhækkunum sem komu til vegna nýs kjarasamnings við Starfsmannafélag Reykjavíkurborgar.
Björn Ingi Hrafnsson, formaður borgarráðs, segir þá Ármann og Ásgeir hafa kynnt borgarráði þetta í dag og greinilegt sé að vandinn hafi legið fyrir frá því í apríl og að fara þyrfti í aðgerðir vegna rekstrartaps. Fyrir liggi að tap hafi numið milljón krónum á dag um nokkurt skeið og því verði að gera stjórnsýsluúttekt á rekstri fyrirtækisins.
„Í henni þarf m.a. að koma fram hver framlög hafa verið frá einstökum aðildarsveitarfélögum, það liggur fyrir að Reykjavíkurborg hefur staðið við allt sitt að því er við vitum best. Það þarf að fara fram allsherjarendurskoðun á fyrirtækinu með það fyrir augum að bæta þjónustuna,“ segir Björn Ingi. Ef í ljós komi að einstök sveitarfélög hafi ekki staðið við sínar skuldbindingar sé það auðvitað ekki gott, líkt og Dagur B. Eggertsson hélt fram í samtali við Fréttavef Morgunblaðsins og vitnaði í borgarráðsfund í dag.
Björn Ingi segir að það hefði átt að koma fram í kosningabaráttunni nú í vor að tap Strætó hefði numið einni milljón á dag. Til framtíðar litið sé þjónustuskerðing ekki lausn málsins, standa verði að málum þannig að borgarbúar verði sáttir. Stjórnsýsluúttektin ætti að taka 1-2 mánuði og því að liggja fyrir með næsta hausti. Björn segir nauðsynlegt að benda á að borgarráð taki ekki ákvörðun um að fella niður þjónustuleiðir Strætó, það sé verk stjórnar Strætó.
Stjórn Strætó var gerð grein fyrir rekstrarvandanum bent á að ein leið til þess að bregðast við honum væri að hefja ekki á ný akstur á 10 mínútna tíðni. Á síðasta fundi fyrrverandi stjórnar sem í júní hafi ráðstafanir vegna manneklu verið kynntar, m.a. að leggja niður akstur á leiðum S4 og S5. Leið S4 tókst að manna en ekki leið S5, sem var lögð niður tímabundið frá og með 1. júlí. Á fundi stjórnar Strætó 11. júlí s.l. var síðan ákveðið að grípa til þess ráðs að hefja ekki aftur akstur með 10 mínútna tíðni og leggja niður leið S5.
Við upptöku nýs leiðakerfis í júlí 2005 var ljóst að akstursmagn í hinu nýja leiðakerfi varð talsvert meira en gert hafði verið ráð fyrir í upphafi þegar gerð var fjárhagsáætlun fyrir árið 2005. „Aukninguna mátti bæði rekja til þeirra breytinga sem leiðakerfið tók í meðförum, sem og þeirrar staðreyndar að byggðin á höfuðborgarsvæðinu hefur verið að stækka og þenjast út,“ segir í minnisblaðinu. Tekjur jukust ekki með nýju leiðakerfi og breytingu í tíðni þar sem farþegum fækkaði.
Á stjórnarfundi 31. mars s.l. var fjallað um drög að endurskoðaðri fjárhagsáætlun fyrir 2006, sem ljóst var orðið að mundi ekki standast, þar sem tekjur voru undir áætlun, gjöld umfram áætlun og ekki hafði verið gert ráð fyrir kostnaði vegna nýrra kjarasamninga. Greinargerð var lögð fram um stöðu mála, þar sem m.a. sagði, að óhjákvæmilegt hlyti að vera að fjalla ítarlega um ráðstafanir vegna fjárhagsstöðu byggðasamlagsins enda lægi fyrir í stjórn að endurskoða þyrfti fjárhagsáætlun 2006.
|
Minnisblað um Strætó bs. |
