Samþykkt var í menntaráði í dag að skipta ráðinu í tvennt. mbl.is/Ómar

Óánægja meðal minnihlutans með boðun fundarins

Segir Stefán Jón Hafstein,fulltrúi Samfylkingarinnar í menntaráði, að það hafi komið á óvart að boðað væri til skyndifundar með tveggja daga fyrirvara föstudaginn fyrir Verslunarmannahelgi.

„Í útsendum gögnum var meðal annars ný samþykkt fyrir leikskólaráð sem við höfum marga fyrrivara við, en ekki tekið fram að málið væri til afgreiðslu á fundinum, enda stórt og viðamikið.

Í upphafi fundar óskuðum við (Samfylking og Vinstri grænir) eftir því að ráðið fengið skriflegar umsagnir frá fagstéttum grunn- og leikskóla auk fleiri upplýsinga sem við töldum nauðsynlegar áður en ráðið ályktaði um málið.

Mikil andstaða kom fram á fundinum við áform meirihluta, og óskaði m.a. fulltrúi Samfoks skriflega eftir svörum við sams konar spurningum og við bárum upp. Eigi að síður kynnt formaður í fundarlok umsögn sem greiða átti atkvæði um. Við í minnihluta neituðum að greiða atkvæði enda skorti öll þau gögn sem kjörnir fulltrúar og áheyrnarfulltrúar höfðu beðið um skriflega.

Sjálfstæðismenn og Framsóknarmenn gengu því einir til atkvæða, en þessi vinnubrögð eru í fullkominni andstöðu við góð vinnubrögð í borginni. Harðar bókanir gengu á víxl og þótti okkur einkar furðulegt að meirihlutinn skyldi fyrst samþykkja umsögn um málið en síðan fela sviðstjóra menntasviðs að afla þeirra gagna sem beðið hafði verið um," að sögn Stefáns Jóns.

Stefán Jón segir að þetta séu klárlega tilburðir til sýndarsamráðs og boði ekkert gott um vinnubrögð meirihluta.

„Ég bað um að fundinum yrði frestað svo við gætum að minnsta kosti unnið vandað álit sjálf í minnihlutanum, en því hafnaði formaður, en dró sjálfur úr pússi sínum fyrirfram unna umsögn sem hann hefði vel getið sent okkur hinum út til kynningar, en kaus af einhverjum ástæðum að gera ekki," að sögn Stefáns Jóns Hafstein.

Eðlilegt að vinna svona mál hratt segir formaður menntaráðs

Júlíus Vífill Ingvarsson, formaður menntaráðs, segir að meirihlutanum í menntaráði hafi þótt mikilvægt að afgreiða mál sem þetta hratt en ekki draga hlutina á langinn eins og fyrri meirihluti hafi oft gert á sinni valdatíð.

„Það hefur mjög neikvæð áhrif á þá sem starfa við viðkomandi málaflokka, í þessu tilviki við menntamál barna, að draga afgreiðslu mála. Við viljum koma í veg fyrir það að starfsfólk þurfi að búa við það kannski vikum ef ekki mánuðum saman að rætt sé um breytingar sem vofir yfir þeim án þess að gengið sé frá þeim,” segir Júlíus Vífill.

Segir hann að almennt sé það ljóst að þessi breyting er auðveldari fyrir alla þá sem að henni koma ef hún er framkvæmd hratt.

„Við ætlum að vinna hratt hér í borginni. Við höfum sagt það að við munum framkvæma og það hratt,” segir Júlíus Vífill.

Júlíus Vífill telur það skrýtið að Stefán Jón Hafstein velti sér upp úr forminu sem ljóst sé að er í góðu lagi.

„Þessi fundur sem haldinn var í menntaráði í dag var fyrst og fremst haldinn til þess að fá fram hugmyndir og faglegt samráð við þá sem þekkja þessi mál vel,” segir Júlíus Vífill.

Segir Júlíus Vífill að ekki hafi komið neinar hugmyndir frá Stefáni Jóni og félögum í minnihlutanum heldur hafi þau fyrst og fremst velt sér upp úr því hvort það ætti að afgreiða málið í dag eða einhvern næstu daga. Það er nú ekki vænlegt til árangurs, segir Júlíus Vífill.

Fyrirspurnir og bókanir frá áheyrnarfulltrúum

Áheyrnarfulltrúi SAMFOKs lagði fram eftirfarandi fyrirspurn á fundi menntaráðs:

1. Hvaða faglegu sjónarmið og rök liggja að baki tillögunni?
2. Hvaða rekstrarlegu sjónarmið og rök liggja að baki tillögunni?
3. Hver er áætlaður kostnaður við fyrirhugaðar breytingar?
4. Hver eru viðhorf starfsmanna leikskóla og grunnskóla og starfsmanna á Fríkirkjuvegi 1 til breytinganna?

Áheyrnarfulltrúar leikskólastjóra, leikskólakennara og grunnskólakennara lögðu fram eftirfarandi bókun:

„Þrátt fyrir góðan ásetning teljum við að fyrirhugaðar breytingar á menntaráði og Menntasviði séu skref aftur á bak þar sem menntun barna á að vera heildstætt ferli. Menntaráð er vettvangur til þess að skapa umgjörð um það.

Fulltrúarnir leggja til að skoðað verði að ráðin heiti menntaráð vegna leikskóla og menntaráð vegna grunnskóla."

Áheyrnarfulltrúi samtakanna Börnin okkar lögðu fram eftirfarandi bókun:

„Samtökin Börnin okkar taka undir ályktun frá Reykjavíkurdeild Félags leikskólakennara og Kennarafélagi Reykjavíkur um stofnun sérstaks leikskólaráðs í Reykjavík.

Lýsum við yfir áhyggjum af því að stofnun sérstaks leikskólaráðs muni hafa neikvæð áhrif á samvinnu og samstarf á milli þessara tveggja skólastiga.

Samtökunum Börnunum okkar þykir eðlilegt að slík ákvörðun sé tekin í sátt við fagfólk í grunnskólum og leikskólum ásamt fagfólki á Menntasviði."

Fulltrúar Sjálfstæðisflokks og Framsóknarflokks lögðu fram eftirfarandi tillögu að umsögn menntaráðs:

„Menntun barna og unglinga er grundvallarþáttur fjölskyldustefnu borgarstjórnar Reykjavíkur. Þær breytingar sem stefnt er að með aðgreiningu leikskólaráðs og menntaráðs endurspegla þær auknu áherslur sem lagðar verða á menntun og þroska barna. Til að tryggja skilvirka stjórnsýslu og nauðsynlega nánd við þau verkefni sem núverandi menntaráð hefur til umfjöllunar er mjög æskilegt að færa tvö meginverkefni ráðsins til nýrra sjálfstæðra ráða en um leið að skilgreina leiðir og framtíðarsýn í menntun reykvískra barna. Með aðgreiningunni gefst tækifæri til þess að færa nýjan faglegan kraft í þá málaflokka sem heyra munu undir bæði mennta- og leikskólaráð.

Í því sambandi er nauðsynlegt að fastsetja samráð og samstarf grunnskólans og leikskólans enda er stefnt að því að mörkin á milli þessara tveggja skólastiga séu sveigjanleg og að þau taki í auknum mæli mið af einstaklingsbundnum þörfum barna. Samstarfi getur verið komið á með ýmsum hætti og hvetur menntaráð til þess að skoðaðar verði vel þær leiðir sem til greina koma og að þær verði bundnar í samþykktum ráðanna ef kostur er.

Mikilvægt er að í samþykkt fyrir leikskólaráð komi fram meginhlutverk leikskólans sem er menntun leikskólabarna. 2. gr. samþykktarinnar tekur ekki á þessu atriði og ber því að breyta greininni til samræmis við 2. gr. samþykktar fyrir menntaráð með eðlilegri aðlögun. Á sama hátt verður að breyta 3. gr. samþykktar fyrir leikskólaráð á þann hátt að leikskólaráð geri tillögu til borgarráðs um menntastefnu borgarinnar í málefnum leikskólabarna.

Ekki er ástæða til þess að hafa tvö mismunandi ferli varðandi ráðningu grunnskólastjóra annars vegar og leikskólastjóra hins vegar. Lagt er til að 11. gr. samþykktar fyrir leikskólaráð verði færð til samræmis við samsvarandi grein í samþykkt fyrir menntaráð.

Til að tryggja farsæla aðgreiningu menntaráðs og stofnun nýs leikskólaráðs á faglegum grunni er sérstaklega nauðsynlegt að vinna náið með sérfræðingum Menntasviðs. Þeir gegna lykilhlutverki í því breytingaferli sem framundan er. Auk þess verði unnið með fulltrúum leik- og grunnskóla og öðrum þeim sem starfa að velferð og framtíð barna.

Menntaráð fagnar þeim metnaðarfullu breytingum sem að er stefnt og telur æskilegt að þeim verði hraðað svo sem kostur er."

Fulltrúar Samfylkingar og Vinstri hreyfingarinnar græns framboðs óskuðu eftir að afgreiðslu á tillögu að umsögn verði frestað.

Tillaga um frestun á afgreiðslu felld með 4 atkvæðum gegn 3.

Tillaga að umsögn menntaráðs samþykkt með 4 atkvæðum, að því er segir í fundargerð menntaráðs frá því fyrr í dag.