Stígamót hafi sent út fréttatilkynningu í júní og í framhaldi af því bréf til umsjáraðila útihátíða þar sem bent var á þrennt: Í fyrsta lagi nauðsyn þess að boðið væri upp á áfallahjálp á slíkum samkomum; í öðru lagi að tryggt væri að þjónustan væri vel kynnt öllum hátíðagestum og í þriðja lagi að unglingar undir 18 ára aldri ættu ekki að hafa aðgang að slíkum skemmtunum eftirlitslaust.

Í tilkynningu frá Stígamótum segir: „Til áréttingar buðu Stígamót upp á þjónustu sína til þess eins að tryggja að skortur á þjálfuðu starfsfólki kæmi ekki í veg fyrir að áfallahjálp væri í boði. Að sjálfsögðu er eðlilegast að heimafólk á hverjum stað sé fært um að sinna slíkum störfum og flest bendir til að svo sé.

Í fjölmiðlum hafa Stígamót lofað það framtak og þá ábyrgð sem flestir mótshaldarar hafa sýnt með því að gera ráð fyrir áfallateymi. Um gæði þjónustunnar eða vinnubrögð hafa Stígamót ekkert sagt, enda ókunnugt um þau.

Gagnrýni Stígamóta hefur eingöngu snúist um að skort hefur á að þjónustan hafi verið kynnt á sama hátt og önnur þjónusta á mótssvæðum. Það er augljóslega hætta á að góð þjónusta sé vannýtt ef hún er ekki vel kynnt þeim sem kynnu að þarfnast hennar.“