Sjósundkappinn Benedikt S. Lafleur, sem hyggst synda Ermarsundið til þess að vekja athygli á mansali, þurfti að hverfa frá sundi á laugardaginn þegar hann synti annan áfanga Reykjavíkursundsins. Í kjölfarið ákvað Benedikt að hætta við að synda þriðja áfanga sundsins, þar sem það þjónaði engum sérstökum tilgangi lengur.

Benedikt komst í hann krappan á laugardaginn þegar hann ætlaði synda frá bækistöð Lýsis í Örfirisey að Bakkavör á Seltjarnarnesi. Eftir rúmlega 5 km sund var skyggni orðið svo lélegt að hann tapaði áttum og björgunarsveitarmenn sem fylgdu honum gátu ekki lengur ábyrgst öryggi hans. "Sundið gekk mjög vel framan af og ég fékk vind sem ýtti mér nánast að Gróttu. Það fór hins vegar mikill tími og orka í að synda fram fyrir Gróttu og þá straumakvörn sem þar er og eftir það fór skyggnið að leika okkur björgunarsveitarmenn grátt," segir Benedikt. Hann segir að þótt sundið hafi ekki tekist hafi hann öðlast ómetanlega reynslu og nýja þekkingu sem muni reynast honum dýrmæt í Ermarsundinu. Hann segist nú búa yfir auknu úthaldi og kuldaþoli og hafa aukna reynslu af glímunni við sjávaröflin auk þess sem hann hafi fundið nýja og betri leið til þess að nærast á meðan á sundinu stendur. "Það er gríðarlega mikilvægt fyrir sjósundmenn að finna rétta fæðu á sundinu þar sem ógleði gerir vart við sig vegna seltu sjósins og næringarskorts" segir Benedikt og kveður leynivopnið við sjávarógleði vera blöndu af aloe vera og tei. Benedikt heldur út til Englands á morgun þar sem hann mun meðal annars þreyta sex tíma sundpróf sem allir sem hyggjast synda yfir Ermarsundið þurfa að taka. 26. ágúst kemur samstarfsfólk Benedikts til Englands og í kjölfarið mun hann gera tilraun til þess að komast yfir sundið.

Mikill áhugi og hlýhugur

Sundleiðin um Ermarsund er á milli 32 til 35 km löng og tekur það þaulvana sjósundmenn frá 11 til 16 klukkutíma að synda yfir. Benedikt segist hafa fundið fyrir miklum áhuga á sundinu og hlýhug bæði frá fyrirtækjum og einstaklingum sem hafa styrkt hann. Talsvert vanti þó upp á almennan fjárstuðning til þess að endar nái saman hjá sér. Benedikt segist þess þó fullviss að Íslendingar muni taka við sér þegar hann syndir Ermarsundið og sýni því verðuga málefni sem hann hefur vakið athygli á dyggan stuðning.