Á annan tug mótmælenda hefur farið inn á byggingasvæði álvers Alcoa-Fjarðaráls við Reyðarfjörð á milli fimm og hálfsex í morgun. Tveir mótmælendanna hafi klifrað upp í 40 til 50 metra háan byggingakrana með lök með áletruð mótmæli en það er nokkuð hvasst á staðnum og nokkur hætta talin fylgja slíkum aðgerðum. Lögreglan er komin á staðinn og er hún búin að handtaka nokkra mótmælendur.

„Við erum búin að handtaka nokkra mótmælendur og tryggja öryggi sumra, þetta er stórt svæði en aðgerðir ganga vel," sagði lögregluþjónn sem Fréttavefur Morgunblaðsins náði tali af. Það er verið að vinna að því að ná mönnunum sem eru uppi í krananum niður.„Sumir mótmælendanna eru búnir að festa sig við vinnuvélar og kranana, aðrir ekki," sagði lögreglan.

„Aðgerðir ganga vel en þetta tekur sinn tíma," sagði lögreglan jafnframt í samtali við Fréttavef Morgunblaðsins, talið er að mótmælendur séu flestir útlendingar.

Í fréttatilkynningu frá hóp sem nefnist Saving Iceland segir að mótmælendurnir séu hópur umhverfissinna sem stefni að því að vekja athygli á þeirri ógn sem náttúru Íslands, menningararfi og lýðræði landsins stafi af starfsemi Alcoa.

Samkvæmt upplýsingum Morgunblaðsins sátu tveir úr hópnum Saving Iceland við veginn um 500 metra frá álverslóðinni og fylgdust með félögum sínum uppi í kranabómunum. Þá kom að bíll og fólk í bílnum gerði sér lítið fyrir og hellti úr 2 lítra kókflösku yfir mótmælendurna og ók síðan áfram.