Tveir lögreglumenn á Austurlandi fengu styrk frá álfyrirtækinu Alcoa á Reyðarfirði til þess að fara á námskeið í fíkniefnaleit á Flórída í Bandaríkjunum haustið 2004.

Þetta kemur fram á heimasíðu Alcoa, þar sem skýrt er frá ýmsum verkefnum sem fyrirtækið hafi stutt á undanförnum árum, en þar á meðal má einnig nefna Neistaflug, Þjóðahátíð Austfirðinga, umferðarfræðslu fyrir börn í Fjarðabyggð, loftslagsverkefni Landverndar, Átaksverkefni um fjölmenningu, þróun námsbrautar og kennslustuðning við Verkmenntaskóla Austurlands o.fl.

Inger L. Jónsdóttir, sýslumaður á Eskifirði, sagði að lögreglumennirnir hefðu átt frumkvæði að því að fara á námskeiðið og gert það í eigin frítíma og aðkoma embættisins ekki verið önnur en sú að manna stöður þeirra meðan þeir hefðu verið í burtu.

Öfluðu sjálfir styrkjanna

Inger sagði einnig að lögreglumennirnir tveir hefðu sjálfir aflað styrkja til fararinnar, en um hefði verið að ræða um það bil tveggja vikna námskeið í Jacksonville á Flórída og hefði það varðað þjálfun í rannsókn fíkniefnamála og þjálfun í leit að fíkniefnum með hundum.

Lögreglumennirnir hefðu leitað til fyrirtækja og stofnana um styrki til fararinnar og hefðu greinilega þarna hlotið einn styrk frá Alcoa-Fjarðaráli.

Inger sagði aðspurð að það væru skýrar verklagsreglur um það að lögreglan þiggi ekki styrki nema með leyfi viðkomandi lögreglustjóra og þá sé það metið í hvert skipti fyrir sig. "Í þetta skipti var þetta ekkert á vegum embættisins og mér var einfaldlega ekki kunnugt um hvaða styrki þeir fengu," sagði Inger.

Spurð hvort hún teldi ekki óheppilegt að einkafyrirtæki veitti lögreglumönnum styrki í tilfelli eins og þessu, sagði hún að hafa þyrfti strangt eftirlit með því og mistökin hefðu ef til vill legið í því að bera það ekki undir lögreglustjóra hvaðan styrkirnir kæmu.

Hún sagði að lögreglumennirnir hefðu einnig fengið styrki frá fleiri aðilum til fararinnar, þar á meðal frá Fjarðabyggð.