Það eru um 300 Íslendingar á 12 hótelum staddir á í tyrkneska bænum Marmaris þessa stundina. Þorsteinn Guðjónsson framkvæmdastjóri ferðaskrifstofunnar Úrvals Útsýnar sagði að fararstjórarnir hefðu farið á öll hótelin og rætt við Íslendingana sem allir eru heilir á húfi. „Við vöknuðum upp við vondan draum og erum að viða að okkur upplýsingum um ástandið," sagði Þorsteinn í samtali við Fréttavef Morgunblaðsins.

Þorsteinn sagði að nýr hópur væri á leiðinni út á morgun og að fólk virtist halda ró sinni og fylgjast með fréttum því enginn hefði enn sem komið er farið fram á endurgreiðslu eða væri hættur við ferðina. Sömuleiðis hefði enginn þeirra farþega sem eiga viku eftir af fríinu sínu úti í Marmaris farið fram á að fara fyrr heim. Taldi hann það vera vísbendingu um að menn teldu að ástandið væri ekki farið úr böndunum.

Þorsteinn sagði að menn hefðu róast við þær fregnir að hryðjuverkin hefðu að öllum líkindum verið framin af Kúrdum, en þeirra aðgerðir hafa hingað til gengið út á að vekja á sér athygli fremur en að ráðast á fólk.