Þrjár sprengingar urðu í tyrknesku hafnar- og ferðamannaborginni Marmaris í gærkvöldi, eftir miðnætti að tyrkneskum tíma. Samkvæmt fyrstu fregnum AFP-fréttastofunnar beið enginn bana í tilræðunum en sextán særðust, þar af tíu Bretar og fjórir þeirra alvarlega. Talsverður hópur Íslendinga er í borginni og voru þeir allir sagðir ómeiddir.

Ein af sprengjunum sprakk skammt frá hóteli um 30 Íslendinga. Ragnheiður Haraldsdóttir, sem þar dvelur ásamt dóttur sinni, sagði að sprengingin hefði orðið í ruslatunnu í innan við 100 metra fjarlægð frá hótelinu.

Héldu sig innandyra

"Við vorum nýsofnaðar þegar við vöknuðum við sprenginguna," sagði hún. Hinar sprengjurnar tvær hefðu sprungið við höfnina þar sem ferðamenn væru jafnan flestir en hún sagðist hafa þær upplýsingar frá fararstjóra Úrvals-Útsýnar að enginn Íslendingur hefði meiðst í sprengingunum. Eftir að sprengingin kvað við dreif að lögreglu- og sjúkrabíla. Öllum götum var lokað og taldi Ragnheiðar réttast að halda sig innandyra.

Að sögn Ragnheiðar eru flestir Íslendinganna á hótelinu eldra fólk eða ungmenni og töluverð ónot gerðu vart við sig í hópnum. Margir ræddu um að fara fyrr heim en til stóð en Ragnheiður segist þó ekki búast við að af því verði.

Dóttirin byrjuð að pakka niður

"Við erum búnar að vera hér í tvær vikur ekki á morgun heldur hinn og þá voru áformin þau að fara heim. Ég sé reyndar að dóttir mín er að pakka.

Okkur verður líklega ekki svefnsamt í nótt. Við notum síðasta daginn í að slappa af og komum svo heilu og höldnu heim á þriðjudaginn," sagði hún.