ICELAND EXPRESS mun bæta við að minnsta kosti þremur nýjum flugleiðum frá og með næsta vori. Flogið verður daglega til Parísar og eins til Noregs, væntanlega um fimm sinnum í viku til Óslóar og tvisvar til Björgvinjar eða Bergen. Félagið mun kynna og fara að selja flugmiða til þessara áfangastaða nú í október. Eins eru stjórnendur Iceland Express alvarlega að íhuga að bjóða upp á daglegt flug vestur um haf og þá til Orlando í Flórída.

Birgir Jónsson, framkvæmdastjóri Iceland Express, segir flug á vegum félagsins í sumar hafa gengið afar vel og raunar framar vonum og því hyggist menn færa út kvíarnar enn frekar. Þannig hafi félagið náð sterkri stöðu í flugi með erlenda ferðamenn hingað til lands en þeir hafi verið 45-50% farþega og allt að 80% í flugi frá Þýskalandi.

Orðnir umsvifamiklir

Eigandi Iceland Express, Fons, eignarhaldsfélag þeirra Pálma Haraldssonar og Jóhannesar Kristinssonar, er nú kominn með umtalsverð ítök í flugrekstri og ferðaþjónustu í Norður-Evrópu. Félagið er stærsti hluthafinn í sænska lágfargjaldafélaginu FlyMe sem á dögunum keypti meirihlutann í breska leiguflugfélaginu Astraeus en fyrir hafði FlyMe keypt Lithuanian Airlines. Þá keypti Fons skandinavísku ferðaskrifstofuna Hekla Rejser og er stærsti hluthafinn í sænsku ferðaskrifstofunni Ticket. Má ætla að hugmyndir Iceland Express um daglegt flug vestur um haf tengist öðrum rekstri þeirra Fonsmanna en Ticket hefur til að mynda sterka stöðu í sölu ferða í bæði Svíþjóð og Noregi.

Birgir segir Iceland Express hafa unnið með bæði Ticket og Hekla Rejser að því að fá fleiri erlenda farþega til Íslands og það samstarf hafi gefið mjög góða raun.