Mannanafnanefnd hefur samþykkt millinafnið Gilsfjörð. Tekið er fram í úrskurði nefndarinnar að millinafnið Gilsfjörð sé dregið af íslenskum orðstofnum og hafi ekki nefnifallsendingu. Það hafi hvorki unnið sér hefð sem eiginnafn kvenna né sem eiginnafn karla og að það sé ekki ættarnafn í skilningi 7. gr. laga nr. 145/1996 um mannanöfn. Millinafnið Gilsfjörð uppfylli þannig ákvæði 6. gr. fyrrnefndra laga.

Nefndin hefur einnig samþykkt beiðni um karlmannsnafnið Eberg sem eiginnafn, kvenmannsnafnið Tristana sem eiginnafn og karlmannsnafnið Rikharður sem eiginnafn. Í úrskurði nefndarinnar er tekið fram að öll taki nöfnin íslenska eignarfallsendingu, þ.e. Ebergs, Tristönu og Rikharðs. Er síðasta nafnið fært á mannanafnaskrá sem ritmynd nafnsins Ríkharður.

Þá samþykkti nefndin kvenmannsnafnið Asía sem eiginnafn. Tekið er fram í úrskurði nefndarinnar að eignarnafnið Asía taki íslenska eignarfallsendingu, Asíu, og teljist að öðru leyti uppfylla ákvæði 5. gr. laga um mannanöfn. Öll eru fyrrgreind nöfn færð á mannanafnaskrá strax nema Asía, en nefndin samþykkti að nafnið skuli ekki fært á mannanafnaskrá fyrr en beiðni um skráningu þess hafi borist Þjóðskrá.

Nefndin hafnaði beiðni um eiginnafnið Magnus

Nefndin hafnaði aftur á móti beiðni um karlmannsnafnið Magnus sem eiginnafn. Segir í úrskurði nefndarinnar að eiginnafnið Magnus geti ekki talist ritað í samræmi við almennar ritreglur íslensks máls. Einnig kemur fram að samkvæmt upplýsingum Hagstofunnar séu aðeins sex karlar skráðir með nafnið Magnus að fyrra eða síðara nafni, og sé sá elsti fæddur árið 1964. Nafnið komi ekki fyrir í útgefnum manntölum 1845 eða 1910 og því sé ekki hefð fyrir þessum rithætti.