Jónína Bjartmarz umhverfisráðherra segir að það hljóti að vera umhugsunarefni hvort halda eigi áfram að sækja hrafntinnu til viðgerða á Þjóðleikhúsinu þegar næst þurfi að gera við klæðninguna á því. Nýlega voru sótt um 50 tonn af hrafntinnu inn í Hrafntinnusker sem er á friðlýstu svæði. Umhverfisstofnun veitti leyfi til að taka hrafntinnu á svæðinu.

Jónína sagði aðspurð að sér hefði ekki verið kunnugt um að Umhverfisstofnun hefði veitt leyfi fyrir þessari efnistöku, en stofnuninni væri heimilt að veita slíka undanþágu frá reglum um friðlýsingu friðlands að Fjallabaki. Forsætisráðuneytið hefði einnig komið að málinu þar sem friðlandið væri þjóðlenda og því færi ráðuneytið með málið sem eigandi landsins. Forsætisráðuneytið hefði gefið leyfi til að taka hrafntinnuna.

"Það sem mér finnst umhugsunarvert við þetta mál er spurningin um hvað við eigum að gera eftir 50 ár þegar aftur þarf að gera við Þjóðleikhúsið. Það er ekki endalaust hægt að sækja efni til viðgerða á húsinu," sagði Jónína.

Jónína sagði að á árum áður hefðu menn notað hrafntinnu eða önnur fágæt efni á hús hér á landi og nauðsynlegt væri að ræða hvort við ættum að leyfa efnistöku til viðgerða á þeim í framtíðinni.

Umhverfisráðherra benti á að það væri hægt að framleiða hrafntinnu, en sá kostur hefði ekki verið tekinn að þessu sinni, en það væri eðlilegt að skoða þann kost betur.

Hrafntinna fágæt á heimsvísu

Í leyfi Umhverfisstofnunar frá 22. september sl. kemur fram að hrafntinna í hæsta gæðaflokki sé fágæt bæði á landsvísu og á heimsvísu og náttúruverndargildi hennar sé hátt af þeim sökum. Stofnunin telur því ekki hægt að gera ráð fyrir því að hægt verði að taka hrafntinnu úr Hrafntinnuskeri í framtíðinni. Stofnunin bendir á að þessi sérstaka bergtegund hafi mikið sjónrænt gildi sökum hins svarta gljáandi litar síns.

Hrafntinnan var tínd með höndum og flutt á sexhjólum úr Hrafntinnuskeri. Rakað var yfir öll hjólför á svæðinu.