Stúdentar efna til meðmæla á Austurvelli á fimmtudaginn
"Í þessari viku stöndum við stúdentar fyrir meðmælum," segir Sigurður Örn Hilmarsson, formaður stúdentaráðs Háskóla Íslands. "Með því erum við að benda á mikilvægi þess að vel sé gert við menntakerfið í landinu og mikilvægi þess að hér sé þetta þekkingarþjóðfélag sem við teljum að flestir Íslendingar vilji búa í," heldur hann áfram og bendir á að með þessu vilji þeir vekja fólk til umhugsunar um þennan málaflokk. "Við viljum líka gera þetta með jákvæðum hætti," segir Sigurður. "Stundum hefur það nefnilega viljað brenna við að umfjöllun um háskólastigið hefur haft á sér dálítið neikvæðan blæ," bætir hann við.
Nú í aðdraganda kosninga vilja þeir koma af stað vitundarvakningu meðal þjóðarinnar og vonast eftir jákvæðum viðbrögðum stjórnmálamanna. "Tilgangurinn með þessu er auðvitað að gera menntamálin að kosningamáli," segir Sigurður. "Við teljum einmitt að Íslendingar hafi gert upp hug sinn og vilji búa í þekkingarþjóðfélagi," segir hann og að nú sé komið að stjórnvöldum að endurspegla metnað þjóðarinnar.
Aðspurður um fjárskort og þá staðreynd að háskólarnir eru hver af öðrum að sprengja utan af sér húsnæðið segir Sigurður að stúdentaráð vilji að staðið sé myndarlega að menntakerfinu í öllu landinu.
"Við teljum að lykillinn að því að Íslendingar haldi samkeppnishæfni sinni felist í því að hér búi vel menntuð þjóð. Það gerum við með því að búa mjög vel að öllum menntastigum. Vissulega er það alveg rétt að það þarf að byggja meira, fjölga kennurunum og hleypa öllum nemendum að."
Í kjölfar blaðamannafundar þar sem stúdentaráð kynnti meðmælin var hleypt af stað undirskriftasöfnun á vef stúdentaráðs, www.student.is/undirskriftir. "Þar hvetjum við alla námsmenn sem og alla Íslendinga, sem er umhugað um menntamál, til að skrifa nafn sitt. Við vonumst til að fá góðan fjölda til að taka undir með okkur í þessum málstað." Á fimmtudaginn verður efnt til meðmæla á Austurvelli.
"Við erum svolítið að gefa boltann á stjórnmálaflokkana," segir Sigurður. "Ég held við séum nefnilega öll sammála um hvert við viljum stefna en erum að leita eftir því að stjórnmálamennirnir setji sína stefnu skýrt fram."
Í lokin segir Sigurður að ljóst sé að miklu meiri peninga þurfi að setja inn í háskólastigið. "Við stöndum öðrum Norðurlandaþjóðum nokkuð langt að baki í þessum málum. Í síðustu samantekt kom í ljós að Ísland eyddi 1,1% af vergri þjóðarframleiðslu í háskólastigið en hinar Norðurlandaþjóðirnar 1,6-1,9%. "Allar þjóðir eru að bæta um og gefa í og það verðum við svo sannarlega að gera líka. Ef við höldum ekki áfram að sækja fram þá stöðnum við og stöðnun jafngildir afturför í þessum málum."
Í hnotskurn
» Stúdentar gera kröfu um: Þekkingarþjóðfélag. Hærra þekkingarstig skilar arði til samfélagsins.» Jafnrétti til náms. Til að nýta mannauð þjóðarinnar verður að tryggja jafnan aðgang að háskólanámi.
» Nýsköpun. Til að þekkingin skili sem mestum arði þarf að hlúa að hátækni- og nýsköpunarfyrirtækjum.
