Landssamband lögreglumanna telur vinnuumhverfi lögreglumanna sífellt hættulegra. Á síðustu vikum hafa komið upp tvö tilvik þar sem lögregla hefur þurft að hafa afskipti af hættulegum brotamönnum með hlaðin skotvopn en við framkvæmd þeirra starfa geta lögreglumenn verið í augljósri hættu.

Í tilkynningu kemur fram að Landssamband lögreglumanna hefur í mörg ár barist fyrir því að starfsumhverfi lögreglumanna verði bætt og þannig dregið úr þeirri hættu sem felst í framkvæmd lögreglustarfa. Björn Bjarnason, dómsmálaráðherra, hefur sýnt málinu skilning og í samvinnu við Landssamband lögreglumanna viljað leita leiða til að bæta starfsskilyrði lögreglu.

Á síðari hluta síðasta árs sendi Landssamband lögreglumanna Birni Bjarnasyni, dóms- og kirkjumálaráðherra, skýrslu þar sem gerð var grein fyrir óviðunandi vinnuumhverfi lögreglumanna og óskaði LL eftir að ráðherra beitti sér fyrir að starfsumhverfi lögreglumanna yrði bætt. Sambandið fór þess meðal annars á leit að skoðað yrði hvort ekki þætti nauðsynlegt að herða refsingar vegna hótana og ofbeldis í garð lögreglumanna, koma á fót sérstöku áfallateymi til aðstoðar lögreglumönnum vegna erfiðra verkefna auk annarra úrræða sem líkleg væru til að ná árangri.

Það er Landssambandi lögreglumanna sérstakt ánægjuefni að Björn Bjarnason, dómsmálaráðherra, hefur upplýst sambandið um að hann hyggist á yfirstandandi þingi leggja fram lagabreytingatillögu þess efnis að refsingar vegna ofbeldis í garð lögreglumanna og samsvarandi stétta verði hertar verulega, að sett verði inn sérstakt ákvæði í almenn hegningarlög nr. 19/1940 þar sem refsivert verði að tálma því að lögreglumenn gegni skyldustörfum sínum auk þess sem lagt verði til að settur verði á fót vinnuhópur með það verkefni að gera tillögur að verklagsreglum um rannsókn mála er varða ofbeldi gegn opinberum starfsmönnum. Verði þær lagabreytingatillögur að veruleika liggur fyrir að um verður að ræða stór tímamót í réttindabaráttu lögreglumanna og miklar líkur á að starfsumhverfi lögreglumanna muni batna verulega.

Að mati LL eru lagabreytingatillögur þessar í takt við aðrar þær breytingar innan lögreglu sem dómsmálaráðherra hefur staðið fyrir frá því að hann tók við embætti. Meðal annars hefur ráðherra staðið fyrir bættri vitnavernd lögreglumanna, fjölgað stöðugildum í lögreglu auk þess sem ákveðið hefur verið að fjölga nýnemum við Lögregluskóla ríkisins um allt að 50% með það að markmiði að fjölga fagmenntuðum lögreglumönnum. Þá stendur til að setja á fót áfallateymi sérfræðinga til aðstoðar lögreglumönnum í kjölfar erfiðra verkefna. Landssamband lögreglumanna fagnar öllum þessum úrbótum enda mikilvægt fyrir samfélagið allt að lögregla ásamt öðrum fulltrúum valdstjórnar búi við öruggt vinnu- og starfsumhverfi, að því er segir í tilkynningu frá Landssambandi lögreglumanna.