Talsmaður neytenda, Gísli Tryggvason, telur að samruni MS, Norðurmjólkur og Osta- og smjörsölunnar auk hugsanlega Kaupfélags Skagafjarðar, samkvæmt fréttum, muni með alvarlegum hætti brjóta gegn hagsmunum neytenda. Sömuleiðis verði að telja slíkan samruna til þess fallinn að leiða til atferlis sem brjóti gegn réttindum neytenda. Leggur hann til að Alþingi samþykki þegar í stað breytingu á lögum sem komi í veg fyrir samruna af því tagi sem fyrirhugaður er. Með því að afnema undanþágu búvörulaga frá samkeppnislögum, sem heimilar samruna afurðastöðva í mjólkuriðnaði, má afstýra yfirvofandi einokun í mjólkuriðnaði sem myndi draga mjög úr samkeppni í greininni. Tillaga hans byggist á því að samruni sé - ólíkt öðrum frávikum frá samkeppnislögum sem búvörulög heimila - að jafnaði óafturkræfur nema lög standi til ógildingar.

Talsmaðurinn bendir jafnframt á að fordæmi séu fyrir slíkum skjótum afskiptum löggjafans að gefnu sérstöku tilefni sbr. viðbrögð löggjafans við fyrirhugaðri yfirtöku á tilteknum sparisjóði.

Hann tekur fram að embættið taki að jafnaði ekki að eigin frumkvæði afstöðu í málum sem hafa verið til umfjöllunar hjá öðrum eftirlitsaðilum sem hann hefur ekki fengið til umsagnar. Þar sem umræddar fréttir lúta hinsvegar að yfirvofandi samruna, gangi þvert á nýtt og ítarlega rökstutt álit Samkeppniseftirlitsins og feli í sér hættu á óafturkræfum breytingum sem eru til þess fallnar að leiða til mjög skaðlegra afleiðinga fyrir neytendur telur hann eðlilegt að bregðast við með framangreindum hætti.