Lögregluþjónum á helgarvöktum í Reykjavík hafa verið gefin fyrirmæli um að fylgjast sérstaklega með afviknum stöðum þar sem menn gætu setið fyrir konum, í ljósi ítrekaðra nauðgana undir beru lofti að undanförnu. Þrjú mál hafa komið upp á stuttum tíma, þar af ein nauðgun bak við Menntaskólann í Reykjavík og önnur bak við Þjóðleikhúsið þar sem ráðist var á konur, en þessi aðferð við ofbeldi telst nýr angi af nauðgunarmálum sem oftast eiga sér stað í heimahúsum og á salernum veitingahúsa. Auk fyrrnefndu málanna tveggja, sem eru óupplýst, er þriðja nauðgunarmálið frá þessum mánuði til rannsóknar hjá lögreglunni og einnig óupplýst.

Lögreglan í Reykjavík hefur yfir 360 lögreglumönnum á að skipa og 20 menn eru að jafnaði á sólarhringsvakt. Um helgar eru vaktirnar tvöfaldaðar og því 40 lögreglumenn á vakt við eftirlit og útkallsstörf. Geir Jón Þórisson yfirlögregluþjónn segist ekki muna til þess að nokkurn tíma hafi nauðgun átt sér stað bak við Menntaskólann í Reykjavík og við þessu þurfi að bregðast með öllum tiltækum ráðum. Nánar er fjallað um málið í Morgunblaðinu í dag.