Héraðsdýralæknir og búfjáreftirlitsmaður Dalabyggðar segja að hross gangi eftirlits- og heylaus á bæ í Dalabyggð. Þeir segja eigedur hrossanna, sem ekki eru búsettir í sveitarfélaginu, ekki hafa sinnt ítrekuðum beiðnum þeirra um betri umhirðu. Þetta kemur fram í bréfi sem þeir sendu sveitarstjórn Dalabyggðar á dögunum. Sveitarstjórn fól sveitarstjóra að vinna að lausn málsins.

Í bréfinu segir að á jörðinni Lækjarskógi, sem hefur verið í eyði um nokkurt skeið, gangi 15-20 hrossa stóð eftirlitslaust, skjól sé ekkert og auk þess hafi ekki verið heyjað á jörðinni í sumar og því sé nú heylaust á staðnum. „Girðingar umhverfis jörðina eru mjög lélegar og ítrekuð dæmi um að hestarnir hafi sloppið út, bæði út á Vesturlandsveginn með tilheyrandi slysahættu og einnig yfir á nágrannajarðir“ segir orðrétt í bréfinu, og fréttavefurinn Skessuhorn greinir frá.

Við árlega vorskoðun hjá búfjáreftirlitsmanni mælti hann sér mót við eigendur hrossanna en þeir mættu ekki og gat því skoðunin ekki farið fram. „Skömmu síðar sluppu nokkur hross úr girðingunum upp á Vesturlandsveg og ráku lögreglan og undirritaður dýralæknir þau aftur inn. Voru þau hross orðin aflögð og sérstaklega voru tryppi í hópnum orðin horuð“. Haft var samband við eigendur hrossanna og „þeim gert að skaffa skepnunum betra hey og koma fóðrun þeirra í eðlilegt horf. Ekkert hefur síðan frá þeim heyrst“.

Bréfritarar óska eftir því við sveitarstjórn að hún beiti sér í samræmi við lög um búfjárhald og tryggi að hrossunum verði séð fyrir sómasamlegu fóðri og húsaskjóli í vetur „eða verði ella fjarlægð af jörðinni og þau annað hvort seld hæstbjóðanda eða komið í sláturhús“.

Skessuhorn