Ungir frjálshyggjumenn opnuðu vínbúð rétt fyrir kl. 14 á Lækjartorgi í dag og mættu laganna verðir nokkrum mínútum síðar til að loka búðinni. Lögreglumennirnir höfðust þó lítið að í fyrstu þar sem enginn vegfarandi gerði sig líklegan til að kaupa bjór, einu vöruna í búðinni. Lögreglan lagði hald á bjórinn um leið og fyrsta viðskiptavininn bar að garði. Með þessu vildu frjálshyggjumenn mótmæla einokun ríkisins á sölu áfengis.

Í tilkynningu frá Ungum frjálshyggjumönnum segir: ,,Áfengi er lögleg vara á Íslandi. Neysla áfengis er lögleg. Því ætti sala áfengis að vera lögleg með sama hætti og öll önnur sala á vörum og þjónustu í landinu er lögleg. Frjáls sala áfengis þekkist í flestum löndum heims og ætti Ísland þar ekki að vera fast í viðjum fortíðar. Það er sjálfsagður réttur fullveðja einstaklinga að geta keypt áfengi eins og aðrar vörur í verslunum.

Að sama skapi ber að stefna að afnámi tolla og vörugjalda af áfengi svo það heyri til fortíðar að aðeins hinir ríku og efnameiri geti keypt vín með helgarsteikinni. Samkeppni einkaaðila á sviði áfengissölu er til þess fallin að auka verulega þjónustu við neytendur með auknu úrvali, lægra verði og bættu aðgengi að áfengi. Undir einokun ríkisins er áfengi aðeins selt á helstu þéttbýlisstöðum og þurfa margir að fara um langan veg til að sækja vín með matnum. Í frjálsu skipulagi koma vörurnar þangað sem einhver er reiðubúinn að kaupa þær."

Samkvæmt upplýsingum frá lögreglu var átján ára piltur var handtekinn fyrir að selja áfengið í dag. Pilturinn var færður á lögreglustöð og yfirheyrður þar en framferði hans varðar við brot á áfengislögum. Lagt var hald á tvo kassa af bjór vegna þessa.