silja@mbl.is

ÓMETANLEG og óbætanleg náttúruverðmæti fóru forgörðum þegar eigendur frystiklefa, sem Náttúrufræðistofnun Íslands hefur verið með á leigu, ákváðu að farga öllu innihaldi klefans að stofnuninni óspurðri. Var innihaldinu fargað sökum þess að rafmagn fór af frystiklefanum sl. vor með þeim afleiðingum að kjöt sem þar var geymt úldnaði. Ekki er vitað hvort um bilun hafi verið að ræða eða rafmagnið verið tekið af vísvitandi.

Að sögn Jóns Gunnars Ottóssonar, forstjóra Náttúrufræðistofnunarinnar, hefur stofnunin haft 8-10 rúmmetra frystiklefa á leigu sl. 16 ár þar sem geymd hafa verið meira en tvö þúsund fuglasýni, smáhvalur og ýmis minni sýni. Meðal þeirra fugla sem í geymslunni voru má nefna sex erni og fimmtíu fálka, auk ýmissa sjaldgæfra flækingsfugla og afar verðmætrar seríu af teistum sem eru fuglar af svartfuglsætt. Segir hann sum sýnanna allt að þrjátíu ára gömul og því nær útilokað að hægt verði að bæta það tjón sem orðið hafi, en fjárhagslega nemur tjónið tugum ef ekki hundruðum milljóna króna.

Tildrög þess að sýnum NÍ var fargað má rekja til þess að skipt var um eigendur frystiklefaleigunnar fyrir nokkru. Að sögn Jóns Gunnars hefur hann nú komist að því að Heilbrigðiseftirlitið hafði afskipti af nýju eigendunum í maí sl. vegna ábendingar þess efnis að þeir hefðu ekki starfsleyfi. "Þeim var þá tjáð af eigendum að þeir hefðu í hyggju að loka frystigeymslunni og myndu láta alla leigjendur vita," segir Jón Gunnar, en starfsmenn NÍ fréttu fyrst af málinu í síðasta mánuði þegar þeir áttu erindi í frystiklefann. "Okkur er tjáð af eigandanum að þetta hafi allt úldnað og því verið hent á haugana," segir Jón Gunnar, en bendir á að mörg verðmæt sýni hefðu ekki verið ónýt þó frost færi úr þeim. Nefnir hann í því samhengi bæði dýrabein og arnarhami.

Aðspurður segir Jón Gunnar stofnunina vera að hugsa sinn gang en ekki hefur verið tekin ákvörðun um hvort málið verður kært til lögreglunnar.