Flugmenn úr bandaríska sjóhernum voru staddir á Íslandi í síðustu viku en þeir voru hér við æfingar ásamt Landhelgisgæslu Íslands. Meðal þess sem þeir voru að gera var að fljúga eftirlitsflug yfir íslenska fiskveiðilögsögu, og gera leitar- og björgunaræfingar. Að sögn hermannanna gengu æfingarnar vel en þær styttust í annan endann vegna óhagstæðra veðurskilyrða.

Ellefu manna áhöfn kom hingað til lands á rúmlega 30 ára gamalli fjögurra hreyfla P-3 herflugvél til æfinga. Bandaríkjamennirnir nýttu þriðjudag og miðvikudag til æfinga en ekkert var flogið sl. fimmtudag eins og til stóð vegna veðurs.

Að sögn Scott Gundersons, leiðangursstjóra áhafnarinnar, er P-3 gamall og traustur „stríðshestur“ sem hefur verið í notkun sl. 35 ár, en umrædd vél var smíðuð árið 1973. Þrátt hún sé orðin gömul þá er hún vel tólum og tækjum búin. Alls getur 21 verið í áhöfn vélarinnar og flugþol hennar er um 12 klukkustundir.

Vélin er hugsuð sem eftirlitsflugvél á hafi, t.a.m. við kafbátaeftirlit, en þó er hægt er að búa hana vopnum og sprengjum þannig að hún verði hættuleg árásarvél. Þess má þó geta að vélin sem var hér á landi var vopnlaus.

Bandaríkjamennirnir fóru af landi brott á laugardag og var stefnan tekin á herstöð Bandaríkjahers á Sikiley þar sem þeir eru staðsettir.

Kevin O´Connor, sjóliðsforingi og áhafnarmeðlimur, segist vita til þess að Bandaríkin vilji halda áfram samstarfi sínu við íslensk stjórnvöld og Gæsluna á sviði leitar- og björgunaræfinga. Samvinnan við Gæsluna gekk vel að hans sögn og hún gagnast hernum ekki síður en Íslendingum.