Eftir Svein Sigurðsson svs@mbl.is
„Segja má, að árangur hafi orðið á öllum sviðum og einna mikilvægast er, að þegar Kýótó-sáttmálinn verður tekinn til endurskoðunar 2008, munu ekki aðeins koma að henni iðnríkin 35, sem hafa skuldbundið sig til að draga úr útblæstri gróðurhúsalofttegunda, heldur einnig önnur ríki, ekki síst stóru þróunarríkin," sagði Jónína Bjartmarz umhverfisráðherra en hún sat loftslagsráðstefnu Sameinuðu þjóðanna í Nairobi í Kenýa sem lauk í gærkvöld.

Niðurstaða ráðstefnunnar var sú, að Kýótó-sáttmálinn verður tekinn til endurskoðunar 2008 og stefnt að nýjum, sem taka skuli við þegar gildistíma Kýótó-sáttmálans lýkur 2012. Er nýja samningnum ætlað að taka til áranna 2013 til 2017.

Jónína sagði, að kæmu ríki eins og Kína að þessu starfi, myndi það auka þýðingu Kýótó-sáttmálans verulega og hún sagði einnig mikilvægt það samkomulag, sem náðist um aðlögunarsjóð eða -kerfi til að auðvelda Afríkuríkjum að laga sig að eða bregðast við loftslagsbreytingum.

Fram kom hjá ýmsum sérfræðingum á ráðstefnunni, að ætti að takast að koma í veg fyrir alvarlegar afleiðingar loftslagsbreytinga, yrði ekki hjá því komist að grípa til mjög róttækra aðgerða í mengunarmálunum á næstu árum.

Verður að liggja fyrir 2009

Árni Finnsson, formaður Náttúruverndarsamtaka Íslands, sagði í gær, að það væri út af fyrir sig fagnaðarefni, að ákveðið hefði verið að hefja samninga um nýjan sáttmála 2008 en nýr samningur yrði að liggja fyrir ekki seinna en á árinu 2009 ef takast ætti að fullgilda hann áður en núgildandi samningur rynni út. Sagði hann óhemjumikilvægt að stóru þróunarríkin kæmu að samningnum en losun gróðurhúsalofttegunda frá þeim væri mikil og vaxandi.