Atkvæðagreiðsla um einstakar greinar fjárlagafrumvarpsins fyrir árið 2007 eftir aðra umræðu stendur nú yfir á Alþingi. Samkvæmt tillögum meirihluta fjárlaganefndar er gert ráð fyrir því að ríkissjóður verði rekinn með um 9,6 milljarða króna afgangi á næsta ári. Stjórnarandstaðan sat hjá í atkvæðagreiðslu um tillögur stjórnarflokkanna en tillögur frá stjórnarandstöðunni um 7,5 milljarða króna aukin framlög til lífeyristrygginga voru felldar.

Fulltrúar þingflokka tóku til máls um atkvæðagreiðsluna áður en hún hófst. Árni M. Mathiesen, fjármálaráðherra, sagði að atkvæðagreiðslan væri lýsandi fyrir það sem gerðist, þegar efnahagslífið fengi að blómstra og haldið væri fast um ríkisfjármálin. Gert væri ráð fyrir rúmlega 9 milljarða afgangi þrátt fyrir að framlög væru m.a. aukin til heilbrigðiskerfis og menntakerfis og ríkið þyrfti að taka á ný og ófyrirséð útgjöld vegna brotthvarfs varnarliðsins. Árni sagði að þetta væri gott og ábyrgt fjárlagafrumvarp og tillögur stjórnarmeirihlutans væru góðar; þeir sem ekki sæju það væru blindir.

Einar Már Sigurðarson, þingmaður Samfylkingarinnar, sagði að fjárlagafrumvarpið bæri með sér að kosningar væru á næsta ári og því væri aðeins um bráðabirgðafjárlög að ræða. Sagði Einar Már, að ábyrgðarleysi ríkisstjórnarflokkanna í ríkisfjármálum hefði lengi verið áberandi en nú keyrði um þverbak. Þá sagði Einar Már, að lítið mark væri takandi á tillögum meirihluta fjárlaganefndar. Sagði hann að stjórnarandstaðan myndi sitja hjá í atkvæðagreiðslunni um tillögur stjórnarflokkanna enda væru þær óábirgar.

Jón Bjarnason, þingmaður VG, sagði að í fjárlagafrumvarpinu væri margt gott, sem þingmenn flokksins hefðu tekið undir. Hins vegar væri einnig annað, sem væri miður og þannig skorti enn fjármagn til allmargra heilbrigðistofnana. Benti Jón á, að stjórnarandstaðan hefði sameinast um eitt mál, stórátak í lífeyristryggingum elli- og lífeyrisþega.

Guðjón A. Kristjánsson, þingmaður Frjálslynda flokksins, sagði að tillögur stjórnarandstöðunnar um lífeyristryggingar bættu verulega hag aldraðra og öryrkja. Sagði Guðjón að ríkisstjórnin hefði á undanförnum árum fellt allar tillögur stjórnarandstöðunnar við afgreiðslu fjárlaga.

Birkir Jón Jónsson, þingmaður Framsóknarflokks og formaður fjárlaganefndar, sagði að verið að skila 9,6 milljarða afgangi þrátt fyrir hækkun framlaga til mennta- og heilbrigðismálum en engar tillögur kæmu fram frá stjórnarandstöðunni í þeim efnum. Sagði Birkir, að í ljósi sterkrar stöðu ríkissjóðs væri áfram hægt að standa vörð um velferðarkerfið, greiða niður skuldir ríkissjóðs og auka kaupmátt almennings. Þannig yrðu skattleysismörk og barnabætur hækkaður á næsta ári og tekjuskattur og virðisaukaskattur á matvælum yrði lækkaður. Einnig væri frítekjumark lífeyrisþega og aldraðra hækkað. „Ég er mjög stoltur af fjárlagafrumvarpinu," sagði Birkir.

Meðal tillagna frá meirihluta fjárlaganefndar var að hækka framlag til heiðurslauna listamanna um 4,8 milljónir í 48 milljónir. Pétur H. Blöndal, þingmaður Sjálfstæðisflokksins, greiddi atkvæði gegn tillögunni og sagðist vera andvígur því að velja lítinn hóp listamanna og heiðra þá með þessum hætti á sama tíma og aðrir listamenn, sem ættu ekki síður heiður skilið, væru ekki á listanum. Nefndi Pétur sérstaklega Björk Guðmundsdóttur og sagði að hún ætti heiðurslaun skilin þótt ekki væri nema 1 krónu.