Borgarfulltrúar Samfylkingar höfðu óskað eftir gögnunum og létu þeir bóka á fundinum í dag, að gögnin sýndu, að borgarstjóri hafi ekki aðeins farið á bak við borgarráð með því að kaupa lóðirnar á svimandi háu verði heldur hafi hann, með þeirri ákvörðun, gengið gegn rökstuðningi þeirra lögfræðinga sem með málið fóru. Segir jafnframt í bókuninni, að gögnin sýni að það sé alrangt, sem haldið hafi verið fram í bókun meirihlutans í borgarráði fyrir viku, að samkvæmt eindregnum ráðleggingum borgarritara hafi verið ákveðið að fallast á niðurstöðu matsnefndar eignarnámsbóta um verð fyrir lóðirnar.

Borgarfulltrúar Sjálfstæðisflokks og Framsóknarflokks létu á móti bóka, að í bókun Samfylkingarinnar væri um grófan útúrsnúning að ræða. Á síðasta fundi borgarráðs hafi borgarritari kynnt þá eindregnu afstöðu, að ekki ætti að fara með málið fyrir dómstóla og ráðlagt borgarstjóra að fallist yrði á niðurstöðu matsnefndarinnar. Í bókun Samfylkingarinnar séu orð og yfirlýsingar borgarritara á síðasta borgarráðsfundi gerð algjörlega ómerk og það sé mjög alvarlegt, að borgarráðsfulltrúar Samfylkingarinnar skuli reyna að sverta mannorð embættismanns borgarinnar sér til pólitísks framdráttar.