Menntaráð Reykjavíkur hefur ákveðið að hækka niðurgreiðslur vegna skólamáltíða til grunnskóla sem sökum aðstöðuleysis hafa þurft að bjóða nemendum upp á aðkeyptan heitan mat. Niðurgreiðsla til þessara skóla hækkar úr 20 krónum í 70 krónur á máltíð og tekur ákvörðunin gildi frá næstu áramótum.

Að sögn Júlíusar Vífils Ingvarssonar, formanns menntaráðs, hafa skólarnir sem hér um ræðir tekið hærra gjald fyrir skólamáltíðir en þeir sem eru með skólamötuneyti enda aðkeyptur matur dýrari. Hann sagði að ábendingar hafi komið frá foreldrum um að misræmis gætti í verði skólamáltíða eftir hverfum og skólum. Með ákvörðun sinni sé menntaráð að bregðast við því og auka jöfnuð að þessu leyti.

Tillaga um þessar auknu niðurgreiðslur var samþykkt samhljóða á fundi menntaráðs. Í henni segir m.a. að skólamáltíðir séu sjálfsagður hluti skólastarfs, enda öllum ljóst mikilvægi þess að grunnskólanemendur fái í skólum sínum næringarríka og holla máltíð um hádegi. Það sé á valdi hvers og eins skóla hvernig gjaldtöku skólamáltíða sé almennt háttað. "Engu að síður verður ekki horft fram hjá því eðlilega jafnréttissjónarmiði að nokkuð gott samræmi sé á milli hverfa og skóla að þessu leyti.

Með tilliti til þessa samþykkir menntaráð að auka niðurgreiðslur til þeirra grunnskóla borgarinnar sem nú bjóða nemendum aðkeyptan mat og hafa af þeim sökum tekið hærra gjald fyrir skólamáltíðir en almennt er tekið í þeim grunnskólum þar sem mötuneyti eru á staðnum."

Útgjaldaaukningin rúmast innan fjárhagsramma menntasviðs á árinu 2007.