Íslensk stjórnvöld telja að skoða eigi málefni alþjóðaflugs og alþjóðasiglinga innan þess ramma sem Kyoto-bókunin kveður á um, þ.e. með tilstilli ICAO og Alþjóðasiglingamálastofnunarinnar, IMO. Umhverfisráðherra segir, að ekki sé tilefni til þess að íslensk stjórnvöld grípi til meira íþyngjandi aðgerða en önnur ríki vegna losunar gróðurhúsalofttegunda frá flugvélum og skipum. Slíkt gæti haft mikil neikvæð efnahagsleg áhrif fyrir fámennt eyríki sem eigi allt sitt undir alþjóðlegum samgöngum en mundi hafa lítil eða engin áhrif á losun gróðurhúsalofttegunda.

Þetta kemur fram í skriflegu svari Jónínu Bjartmarz, umhverfisráðherra, til Kolbrúnar Halldórsdóttur, alþingismanns. Þar kemur m.a. fram, að hlutur losunar frá innanlandsflugi af heildarlosun gróðurhúsalofttegunda á Íslandi hafi verið rétt um 1% árið 1990 og farið heldur minnkandi síðan. Það hafi því ekki verið forgangsmál hér að draga úr losun í innanlandsflugi og erfitt sé um vik, að koma við nýrri tækni til að draga úr losun. Því yrðu áhrifin líklega fyrst og fremst þau, að gera flug hlutfallslega dýrara en annan samgöngumáta, einkum akstur bíla, þannig að notkun bíla mundi aukast á kostnað innanlandsflugs, með litlum eða engum ávinningi varðandi losun gróðurhúsalofttegunda. Af þessum sökum sé ekki kveðið sérstaklega á um losun frá flugi í stefnumörkun stjórnvalda frá 2002 um aðgerðir til að mæta kröfum Kyoto-bókunarinnar.

Í svarinu segir, að alþjóðaflug sé, ásamt alþjóðlegum siglingum, undanþegið bindandi takmörkunum Kyoto-bókunarinnar. Í ákvæðum bókunarinnar er Alþjóðaflugmálastofnuninni, ICAO, gert að leggja fram tillögur árið 2007. Tillögur þess efnis verði væntanlega lagðar fram á þingi ICAO á næsta ári.

Í svarinu segir, að ríki heims hafi til þessa ekki viljað einhliða grípa til ráðstafana gegn losun frá alþjóðaflugi á meðan málið sé í þessum farvegi. Þó sé ljóst að Evrópusambandið hafi hug á, að setja ákvæði um losun frá flugi inn í tilskipun sína um úthlutun losunarkvóta fyrir koldíoxíð. Framkvæmdastjórn ESB hyggist 20. desember nk. kynna tillögur þess efnis sem eiga að taka gildi á árinu 2011. Samkvæmt fréttum geri tillögurnar ráð fyrir að væntanlegar reglur um takmörkun losunar frá flugi muni gilda um öll flugfélög sem fljúga til landa ESB, einnig þau sem hafa ríkisfang annars staðar.

Losun frá flugi er nú um 3,5% af heildarlosun gróðurhúsalofttegunda í heiminum og fer vaxandi. Umhverfisráðherra segir, að tækniþróun hafi leitt til minnkandi losunar frá flugvélum, sem nemi um 70% minni losun á hvern farþegakílómetra síðastliðna fjóra áratugi. Einnig hafi verið viðleitni í átt til að auka sætanýtingu og hagræða í flugrekstri, sem hafi skilað einhverjum árangri. Hins vegar aukist flug mikið á heimsvísu, sem vegi upp á móti þessari þróun. Þá sé frekari tækniþróun til að minnka losun frá flugi talin erfiðari en hvað varðar bíla, skip og rafmagnsframleiðslu með jarðefnaeldsneyti.

Svarið í heild