Vilja þingmennirnir, að fram að gildistöku laganna, 1. mars á næsta ári, verði tryggt fjármagn til að tryggja fjármagn til að framkvæma öflugt eftirlit með verði á matvöru. Eftir gildistöku laganna skuli svo kannað hvort þær lækkanir opinberra gjalda, sem felist í lögunum, hafi skilað sér til neytenda í formi lægra matvöruverðs.

Þingmennirnir leggja einnig til, að virðisaukaskattur á lyfjum verði lækkaður til samræmis við virðisaukaskatt á matvæli.

Efnahags- og viðskiptanefnd stendur öll að áliti um frumvarpið og leggur fram þá breytingartillögu, eins og fjármálaráðherra óskaði eftir, að felld verði út þau ákvæði sem fjalla um lækkun virðisaukaskatts á áfengi og hækkun áfengisgjalds en samanlagt áttu þær breytingar ekki að hafa áhrif á tekjur ríkissjóðs. Þær breytingar, sem frumvarpið kveður á um, gera ráð fyrir að áfengisgjald hækki um 58% og að virðisaukaskattur á áfengi lækki úr 24,5% í 7%. Helsta markmiðið með þessu er að sala veitingahúsa á áfengi beri 7% virðisaukaskatt.

Efnahags- og viðskiptanefnd mun fara yfir þessar breytingar eftir jólahlé þingsins en afgreiðir aðra þætti frumvarpsins nú og segir það nauðsynlegt þar sem þeir hafa afleiðingar fyrir fjárlög og tekjugrundvöll þeirra.