Einar K. Guðfinnsson sjávarútvegsráðherra segir að hann hafi átt gagnlega fundi með aðilum sem hafa með sjávarútveg að gera í Bandaríkjunum. Einar sagði að þessi fundaröð væri nýbyrjuð, en hann mun funda áfram með þarlendum aðilum í dag og á morgun.

„Þetta er nýbyrjað en ég hef átt á ágætis fundi og gagnlega. Við höfum haft tækifæri til þess að greina frá okkar viðhorfum og útskýra þau, ekki bara um hvalamál heldur sjávarútvegsmál á breiðum grundvelli, auðlindanýtingu og annað. Þetta hafa verið gagnlegir og vinsamlegir fundir," sagði Einar í samtali við Morgunblaðið í gærkvöldi.

Aðspurður hvort mikið hefði verið rætt um hvalamálið, sagði hann að það hefði verið nokkuð, en það væri alls ekki aðalefni fundanna. Það væri ljóst að Íslendingar nytu álits fyrir auðlindanýtingu sína á sjávarútvegssviðinu og hann teldi að öllum væri það ljóst í þeim hópum sem hann ætti viðræður við að Íslendingar væru ekki að fara fram með óábyrgum hætti í þessum hvalamálum til dæmis. „Í raun og veru verð ég ekki var við að menn séu að véfengja til dæmis hinar vísindalegu forsendur fyrir veiðunum eða neitt slíkt, enda er mönnum sem starfa á þessu sviði hvort sem það er í stjórnmálum eða annars staðar það ljóst að Íslendingar vilja varðveita stöðu sína og ímynd sem ábyrg auðlindanýtingaþjóð," sagði Einar.

Hagsmunagæsla fyrir landið

Aðspurður hvort hann hefði einhverja eftirþanka vegna þeirrar ákvörðunar að hefja hvalveiðar sagði hann svo ekki vera. Hins vegar sýndi þetta og sú umræða sem farið hefði fram um botnvörpumálin að æ stærri hluti af starfi þeirra sem væru í stjórnmálum og fengjust við sjávarútvegsmál væri hagsmunagæsla fyrir landið „og það að reyna að útskýra út á við þá hugmyndafræði sjálfbærrar nýtingar sem liggur til grundvallar okkar sjávarútvegi og þar með hvalveiðum", sagði Einar ennfremur.