Vilhjálmur Þ. Vilhjálmsson borgarstjóri kveðst ánægður með þann árangur sem náðst hafi í máli Reykjavíkurborgar gegn olíufélögunum. Það þýði þó ekki endilega að við niðurstöðuna verði unað. Borgaryfirvöld eigi eftir að fara yfir það mál og borgarráð að taka ákvörðun um framhald þess.

Héraðsdómur Reykjavíkur dæmdi Ker, Olís og Skeljung til að greiða Reykjavíkurborg og Strætó bs. samtals um 78 milljónir króna í bætur vegna ólögmæts samráðs olíufélaganna í tengslum við útboð borgarinnar á eldsneytiskaupum.

„Ég hvatti til þess á sínum tíma að látið yrði reyna á þetta mál fyrir dómstólum og það var gert," sagði hann í samtali við blaðamann mbl.is í dag. „Ég tel þessa niðurstöðu góða enda var vel unnið að þessu máli af hálfu borgarinnar með Vilhjálm H. Vilhjálmsson, lögmann borgarinnar, í broddi fylkingar. Það var hins vegar varakrafa okkar sem var samþykkt og þó ég sé ágætlega sáttur við þessa niðurstöðu þýðir það ekki endilega að við hana verði unað. Við eigum algerlega eftir að fara yfir það mál og ræða það í borgarráði þar sem endanleg ákvörðun borgaryfirvalda verður tekin. Síðan eigum við líka eftir að sjá hvað olíufélögin gera," sagði Vilhjálmur Þ. Vilhjálmsson.