Í morgun var tveimur málum sem lögmaður Hannesar Hólmsteins Gissurarsonar hafði höfðað fyrir hönd Hannesar gegn Jóni Ólafssyni frestað í Héraðsdómi Reykjavíkur þar til 12. janúar næstkomandi. Að sögn Sigríðar Rutar Júlíusdóttur, lögmanns Jóns Ólafssonar, er beðið eftir því að dómur sem féll í máli Jóns og Hannesar í síðustu viku í Bretlandi verði birtur opinberlega.

Sigríður Rut segir að málin sem taka átti fyrir í Héraðsdómi Reykjavíkur snúast um að það var til dómur í Bretlandi sem þurfti að innheimta á Íslandi.

Yfirréttur í London ógilti í síðustu viku dóm sem felldur var sumarið 2005 í meiðyrðamáli Jóns Ólafssonar gegn Hannesi Hólmsteini Gissurarsyni og samþykkti rétturinn röksemdafærslu Hannesar, þ.e. að stefna í málinu hefði ekki verið réttilega birt honum samkvæmt íslenskum lögum. Vonast Hannes Hólmsteinn því til að fjárnámsgerð á hendur honum verði felld niður. Hannes hafði krafist ógildingar dómsins og jafnframt mótmælt því að hann yrði fullnustaður hér á landi en að kröfu Jóns gerði sýslumaðurinn í Reykjavík fjárnám fyrir dómkröfunni í skuldabréfi sem Hannes hafði fengið vegna sölu á húsnæði sínu. Hannes var dæmdur til að greiða Jóni 65 þúsund pund fyrir meiðyrði auk um 25 þúsund punda í kostnað, samtals rúmar 12 milljónir króna að núvirði.

Annað málið snérist um beiðni um endurupptöku á að heimila aðför á grundvelli hins erlenda dóms og hitt er beiðni um fjárnámið yrði fellt niður, að sögn Sigríðar.

Jón Ólafsson höfðaði málið fyrir breskum dómstól árið 2004 vegna ummæla Hannesar á ráðstefnu norrænna blaðamanna haustið 1999 og byggði á því að tjón hefði hlotist af þar sem ummælin voru vistuð á vefsvæði Hannesar. Meðal annars voru leidd fyrir dóminn vitni sem höfðu hikað við að stofna til viðskipta við Jón vegna ummælanna.

Eftir að hafa leitað álits lögfræðings Háskóla Íslands og hjá dómsmálaráðuneytinu ákvað Hannes að taka ekki til varna í málinu en aðilar töldu að dómstóll myndi vísa málinu frá vegna skorts á lögsögu. Hins vegar var kveðinn upp útivistardómur og því fallist á kröfur Jóns.