Yfirréttur í London dæmdi í gær Jón Ólafsson til að greiða Hannesi Hólmsteini Gissurarsyni 30 þúsund pund, um fjórar milljónir króna, í málskostnað. Fyrr í mánuðinum ógilti rétturinn dóm sem felldur var sumarið 2005 yfir Hannesi vegna meintra meiðyrða í garð Jóns og var Hannes þá dæmdur til að greiða Jóni 65 þúsund pund fyrir meiðyrði auk um 25 þúsund punda í kostnað, samtals rúmar 12 milljónir króna að núvirði.

Upphæðin sem nú er dæmd Hannesi er til bráðabirgða en málsaðili sem krefst málskostnaðar fyrir breskum dómstólum getur valið á milli þess að fá þann dómara sem dæmdi málið efnislega til að ákveða málskostnaðinn eða beðið dómarann að taka ákvörðun til bráðabirgða. Í kjölfarið er málið sent sérstökum málskostnaðardómara sem dæmir um kostnaðinn endanlega. Ekki er ljóst hvenær ákvörðun mun liggja fyrir en gert er ráð fyrir að það verði fljótlega á nýju ári.

Gæti hugsanlega áfrýjað

Fyrir réttinum í gær voru einnig veittir frestir til enda janúarmánaðar vegna ákvarðanatöku um næstu skref í málinu. Til að mynda óskuðu lögmenn Jóns eftir viðbótarfresti til að íhuga hvort úrskurði yfirréttar yrði áfrýjað til sérstaks áfrýjunardómstóls (e. Court of Appeal).