Sveinn Rúnar Hauksson, læknir og formaður Félagsins Ísland-Palestína, er nú staddur á herteknu svæðunum í Palestínu ásamt Kristínu dóttur sinni. Þau feðgin voru með fjármuni úr neyðarsöfnun félagsins Ísland-Palestína í farteskinu en að sögn Sveins Rúnars hefur gengið erfiðlega að senda peninga til herteknu svæðanna frá Íslandi.

Þegar Fréttavefur Morgunblaðsins náði tali af Sveini Rúnari voru þau feðgin stödd í litlum bæ í nágrenni Hebron.

Sveinn Rúnar hefur átt fundi með ýmsum mannréttinda- og mannúðarsamtökum í Palestínu, meðal annars kvennasamtökum sem Ísland-Palestína ætlar að styðja.

Að sögn Sveins Rúnars hefur félagið safnað um sex milljónum króna á síðustu sex árum og hefur féð meðal annars runnið til Öryrkjabandalags Palestínu og Blindrafélags Palestínu.

Vegna þess að peningasendingar félagsins í gegnum banka hafa verið stöðvaðar í New York þá hefur verið brugðið á það ráð að senda fé með Íslendingum sem eru á leið til Palestínu í ár.

Segir Sveinn Rúnar að svo virðist sem að bann við peningaflutningum, sem í upphafi áttu að gilda um stjórnvöld í Palestínu og samtök þeim tengdum, nái einnig yfir peningasendingar hjálpar- og mannúðarsamtaka.

Eftir kosningarnar fyrr á árinu í Palestínu hafa Bandaríkin og fleiri ríki komið í veg fyrir slíkar peningasendingar en bandarísk stjórnvöld, að sögn Sveins Rúnars, voru mjög ósátt við niðurstöður kosninganna þar sem Hamas-samtökin fóru með sigur af hólmi. Alþjóðasamfélagið hefur að mestu hunsað ríkisstjórn Hamas og neitar að styrkja hana með fé. Er ástæðan sú að Hamas neitar að viðurkenna tilvistarrétt Ísraels og neitar einnig að hafna hryðjuverkum sem aðferð í baráttu sinni gegn Ísraelum. Fjárhagur stjórnarinnar er því kominn í þrot og ekki hægt að borga ríkisstarfsmönnum full laun.

Sveinn Rúnar og Kristín munu koma aftur til Íslands þann 7. janúar.