Innlent | mbl | 31.12.2006 | 9:07 | Uppfært 13:42

Ríkið hættir greiðslum til Byrgisins

Ríkið hefur hætt greiðslum til meðferðarheimilisins Byrgisins að beiðni ríkisendurskoðunar. Ríkisendurskoðandi segir ljóst að eftirliti með styrkjum til félagasamtaka á borð við Byrgið hafa ekki verið sinnt sem skyldi, og boðar úrbætur í þeim efnum.

Ríkisendurskoðun fer nú með fjárhagslega rannsókn á starfsemi Byrgisins og er búist við að henni ljúki um miðjan janúar. Fréttastofa Sjónvarpsins greindi frá þessu.

Sigurður Þórðarson ríkisendurskoðandi sagði í fréttum Sjónvarpsins að styrkir til starfsemi, sem falli utan hins opinbera kerfis, skiptist í tvo flokka. Annars vegar eru tiltekin verkefni styrkt með ákveðinni fjárhæð og verður þá að gera grein fyrir því hvers vegna þörf er á styrk, og svo hvernig hann nýtist. Á hinn bóginn er um ræða þjónustusamninga við stofnanir sem sinna lögbundnum verkefnum, eins og öldrunarþjónustu.

Sigurður segir að Ríkiendurskoðun þurfi að breyta um áherslur í þessu sambandi, enda hafi hún ekki sinnt þessum þætti sem skyldi. Ríkisendurskoðun fór fram á það við félagsmálaráðuneytið í gær að greiðslum til Byrgisins verði hætt þar til rannsókn er lokið. Frá 1999 hefur Byrgið fengið rúmar 200 miljónir króna úr ríkissjóði.