Ögmundur Jónasson, formaður BSRB, segir á vef bandalagsins að BSRB standi á því fastara en fótunum að uppsagnirnar í Snæfellsbæ sl. sumar hafi verið ólögmætar enda tæki frávísun Hæstaréttar ekkert á lögmæti uppsagnanna heldur vísaði málinu frá á lagatæknilegum forsendum.

„Við teljum að fólki hafi verið sagt upp á ómálefnalegum forsendum og eftir stendur að einn starfsmaður, trúnaðarmaður Starfsmannafélags Dala- og Snæfellsnessýslu, hefur ekki verið endurráðinn. Niðurstaða í því grafalvarlega máli fæst vonandi á næstu mánuðum. Þessi mál hafa því ekki verið til lykta leidd,“ segir Ögmundur.

Hæstiréttur hefur staðfest úrskurð Héraðsdóms Vesturlands um að vísa frá máli, sem BSRB höfðaði vegna uppsagna starfsmanna við íþróttahús og sundlaug Snæfellsbæjar. Þeir voru síðan allir endurráðnir utan trúnaðarmaður Starfsmannafélags Dala- og Snæfellsnessýslu.

BSRB segir, að málinu sem vísað var frá hafi verið vegna starfsmanns, sem hafði verið endurráðinn. Var óskað eftir að úrskurðað yrði að uppsögnin hafi verið ólögleg.

Hæstiréttur vísaði málinu frá á þeirri forsendu að dómstólar yrðu ekki krafðir um álit í lögfræðilegum álitamálum. BSRB segir, að dómurinn hafi ekkert tekið neina efnislega afstöðu til lögmætis uppsagnanna og lögfræðilega sé ekkert því til fyrirstöðu að mál verði höfðað að nýju í öðrum búningi. Enn sé svo eftir að taka fyrir mál trúnaðarmannsins sem ekki var endurráðinn.