Samkomulag við ESB um frekari tollalækkanir
ESB og Ísland gengu frá samningi um viðskipti með landbúnaðarvörur á síðasta ári og átti hann að taka gildi um áramót. Ákveðið hefur hins vegar verið að fresta gildistökunni til 1. mars, en þá eiga að koma til framkvæmda aðgerðir til lækkunar á matvælaverði sem ríkisstjórnin boðaði sl. haust.
Valgerður Sverrisdóttir utanríkisráðherra segir að fulltrúar Íslands hafi átt árangursríka fundi með fulltrúum ESB í lok síðasta árs.
"Það er sumsé verið að reyna að freista þess að ná samkomulagi fyrir 1. mars um frekari lækkun á tollum og bættan markaðsaðgang. Það kom fram á þessum fundi vilji til að gera viðbætur á samkomulaginu [um viðskipti með landbúnaðarvörur sem gert var sl. sumar]. Báðir aðilar lögðu fram tillögur þar að lútandi. Það náðist á fundinum bráðabirgðasamkomulag sem verður lagt fyrir aðildarríki ESB um miðjan janúar."
Síðast þegar Hagstofan birti tölur um samanburð á matvöruverði hér á landi við verðlag í ESB var verðlag á Íslandi 48% hærra en í 15 ríkjum ESB. Upplýsingarnar miðuðust við árið 2003. Tölur sem hagstofa Evrópusambandsins, Eurostat, birti vegna ársins 2005 sýna hins vegar verðlag á Íslandi 62% hærra en í ESB. Rósmundur Guðnason, deildarstjóri vísitöludeildar Hagstofu Íslands, segir að sterkt gengi krónunnar árið 2005 skýri nær alfarið þessa breytingu. Eina marktæka breytingin sé að verð á kjöti hafi hækkað. Árið 2003 var kjötverð á Íslandi 43% hærra en í ESB en 2005 var þetta hlutfall 86%.
Girnilegir ávextir en dýrseldir
EKKI er líklegt, að þessi kona, sem var að skoða papriku í Fjarðarkaupum í Hafnarfirði, hafi velt því sérstaklega fyrir sér hvað hún kostaði handan Íslandsála en eins og fram hefur komið er verð á mat- og drykkjarvöru 62% hærra hér á landi en til jafnaðar í gömlu Evrópusambandsríkjunum 15.Ávextir og grænmeti eru 55% dýrari hér en þar en kjötvara 86% dýrari. Mestur er munurinn á áfengi, 135% dýrara hér en í ESB, og tóbakið 73% dýrara. Það, sem kemur þó kannski mest á óvart er, að liðurinn húsnæði, rafmagn og vatn er 51% dýrari hér á landi en að meðaltali í ESB. Þá má nefna fiskinn, sem er 35% dýrari hér.
