Ein viðamesta hönnunarsýning sem haldin hefur verið á Íslandi fer fram á Listahátíð í vor. Sýningin, sem nefnist Kvika, opnar á Kjarvalsstöðum þann 19. maí næstkomandi en á blaðamannafundi í dag var kynntur samstarfssamningur sem Listasafn Reykjavíkur og Straumur–Burðarás Fjárfestingabanki hafa gert um sýninguna. Sýningin er einnig styrkt af iðnaðar- og viðskiptaráðuneytinu.

Að sögn Guðrúnar Lilju Gunnlaugsdóttur, hönnuðar, sem er sýningarstjóri Kviku, munu 50-70 hönnuðir taka þátt í sýningunni en endanlegt val á hönnuðum liggur ekki fyrir. Um íslenska samtímahönnun er að ræða sem spannar öll svið hönnunar, svo sem húsgögn, fatnað, ljós, skartgripi, byggingarlist, vefnað, tækninýjungar og matargerð. Á sýningunni verða einnig kynnt nýsköpunarverkefni fimm hönnuða sem verða unnin sérstaklega fyrir sýninguna.

Að sögn Guðrúnar Lilju eru það hönnuðirnir Ninna Þórarinsdóttir, sem hefur hannað kjól fyrir sýninguna, Páll Einarsson sem er með verk er nefnist Straumrof, Sigríður Heimisdóttir hefur hannað ljós sem nefnist Norðurljós, Unnur Friðriksdóttir hefur hannað töskur fyrir Kviku og Þórunn Árnadóttir hannaði ofn sem er einskonar æðakerfi húsnæðis.

Samfara sýningunni verður gefin út bók um íslenska samtímahönnun og efnt verður til fræðslu- og fyrirlestradagskrár á sýningartímabilinu.

Að sögn Hafþórs Yngvasonar, safnstjóra Listasafns Reykjavíkur, er sýningin Kvika samvinnuverkefni og segir hann að það sannist hér enn einu sinni að þegar margir leggist á eitt þá ber árangurinn það með sér, ekki síst þegar samvinnuaðilarnir koma frá mismunandi stöðum í þjóðfélaginu.

„Hér tengjast list og iðnaður, einkafyrirtæki og opinberar stofnanir. Og það er hönnun sem tengir okkur samann. Hún snertir okkur öll, hver sem við erum og hvar sem við erum. Við getum öll sameinast um mikilvægi hennar og mikilvægi þess að umhverfi okkar sé skapandi.

Listasafn Reykjavíkur metur hönnun sem listgrein og við erum hreykin af því að hafa þessa sýningu innan veggja safnsins, ekki síst á Listahátíð í Reykjavík sem er alltaf heiður af að tengjast," sagði Hafþór á blaðamannafundi þar sem sýningin var kynnt.

Friðrik Jóhannsson,forstjóri Straums Burðaráss sagði á fundinum að það væri Straumi-Burðarási sönn ánægja að taka þátt í hönnunarsýningunni Kviku. „Þar er á nútímalegan hátt tekinn púlsinn á því besta í íslenskri hönnun í dag, sérstaða hennar í hugmyndafræði- og efnislegu samhengi skoðuð og kraumandi kviku sköpunarkraftsins leyft að njóta sín," sagði Friðrik.