Á fundi borgarstjórnar í dag var samþykkt tillaga Samfylkingarinnar að þess verði minnst að á næsta ári eru 100 ár liðin frá því að konur settust fyrst í bæjarstjórn Reykjavíkur en í lok janúar 1908 tóku þær Katrín Magnússon, Þórunn Jónassen, Bríet Bjarnhéðinsdóttir og Guðrún Björnsdóttir sæti í bæjarstjórn.

Samkvæmt upplýsingum frá Samfylkingunni var samþykkt tillaga frá Oddnýju Sturludóttur um að skipuð verði nefnd, sem geri tillögur um hvernig þessara tímamóta verði minnst. Gert er ráð fyrir, að í nefndinni sitji fulltrúar frá meirihluta og minnihluta sem og fulltrúi frá skrifstofu mannréttindaráðgjafa og borgarstjóra og aðrir embættismenn verði kallaðir til eftir því sem þurfa þykir.

Oddný verður nú aðalborgarfulltrúi Samfylkingarinnar í borgarstjórn í stað Stefáns Jóns Hafsteins, sem farinn er til starfa sem verkefnisstjóri á vegum Þróunarsamvinnustofnunar.

Sigrún Elsa Smáradóttir flyst jafnframt upp í sæti fyrsta varaborgarfulltrúa, Stefán Benediktsdóttir, arkitekt, verður varaborgarfulltrúi og Felix Bergsson, leikari, tekur sæti í borgarstjórnarflokki Samfylkingarinnar.

Oddný tekur sæti Stefáns Jóns í menntaráði og menningar- og ferðamálaráði. Stefán Benediktsson var kjörinn aðalmaður í skipulagsráði og Stefán Jóhann Stefánsson í velferðarráði en Oddný víkur sæti úr þessum tveimur ráðum. Dagur B. Eggertsson tekur sæti Stefáns Jóns í Orkuveitu Reykjavíkur en Steinunn Valdís Óskarsdóttir sæti Dags í stjórn Faxaflóahafna.