Á vef Vegagerðarinnar má sjá að sl. mánudag var lengd ganga frá Siglufirði um 666 metrar og Ólafsfjarðarmegin um 357 metra. Samtals er því búið að sprengja 1.023 metra sem er um 9,6% af heildarlengd ganganna.

Að sögn Sigurðar er bergið í fjallinu gott. Bendir hann á að ávallt í upphafi jarðgangagerðar fari menn sér rólega meðan þeir eru að venjast berginu en þegar þekking á fjallinu liggi fyrir að nokkrum tíma liðnum þá fari hlutirnir að ganga hraðar. „Nú þegar menn eru farnir að slípast til og farnir að þekkja fjallið þá fer þetta að ganga betur og hraðar,“ segir Sigurður.

Sem kunnugt er var verksamningur um gerð Héðinsfjarðarganga milli Vegagerðarinnar, sem verkkaupa, og Metrostav-Háfells, sem verktaka, undirritaður á Siglufirði í maí á síðasta ári.

Samkvæmt upplýsingum frá Vegagerðinni hófust framkvæmdir á verkstað síðla í júní sl. við gröft á forskeringu við gangamunna Siglufjarðarmegin. Síðan var unnið að forskeringum, bæði í Siglufirði og Ólafsfirði og gangagreftri Siglufjarðarmegin og 1. nóvember hófst gangagröftur frá Ólafsfirði. Ennfremur hefur verið unnið að almennri aðstöðusköpun og m.a. er risin steypustöð á Ólafsfirði. Vegagerð er hafin á báðum stöðum en fremur lítið hefur verið unnið við vegagerð utan ganga að undanförnu vegna tíðarfars. Við verkið starfa alls um 80 starfsmenn. Umsjón framkvæmda og eftirlit er í höndum GeoTek ehf.